ભાજપના ધારાસભ્ય યોગેશ પટેલના નિધનથી બેઠક ખાલી; ગુજરાતમાં બે મહિનામાં બીજી વિધાનસભા પેટાચૂંટણી
રાજકોટ: ગુજરાતમાં બે મહિનાના ગાળામાં બીજી વિધાનસભા પેટાચૂંટણી યોજાવાની છે. વડોદરાની માંજલપુર વિધાનસભા બેઠક પર ભાજપના ધારાસભ્ય યોગેશ પટેલના નિધન બાદ ખાલી પડેલી બેઠક માટે ચૂંટણી પંચે પેટાચૂંટણીની જાહેરાત કરી છે. આ બેઠક પર 30 જુલાઈએ મતદાન યોજાશે, જ્યારે 3 ઓગસ્ટે મતગણતરી અને પરિણામ જાહેર કરવામાં આવશે.
ચૂંટણી પંચે દેશની ત્રણ વિધાનસભા બેઠકો માટે પેટાચૂંટણી જાહેર કરી છે. ગુજરાતની માંજલપુર બેઠક ઉપરાંત બિહાર અને મધ્યપ્રદેશની એક-એક બેઠક પર પણ 30 જુલાઈએ મતદાન થશે. ચૂંટણી કાર્યક્રમ મુજબ 14 જુલાઈથી ઉમેદવારીપત્રો ભરવાની પ્રક્રિયા શરૂ થશે, ત્યારબાદ નિયત કાર્યક્રમ અનુસાર ઉમેદવારીની ચકાસણી અને ઉમેદવારી પરત ખેંચવાની કાર્યવાહી હાથ ધરાશે.
આ અગાઉ ગુજરાતમાં ઉમરેઠ વિધાનસભા બેઠક પર પણ પેટાચૂંટણી યોજાઈ હતી. ભાજપના ધારાસભ્ય ગોવિંદ પરમારના અવસાન બાદ યોજાયેલી ચૂંટણીમાં તેમના પુત્ર હર્ષદ પરમાર ભાજપની ટિકિટ પર વિજેતા બન્યા હતા.
વડોદરાની માંજલપુર બેઠક લાંબા સમયથી ભાજપનો મજબૂત ગઢ માનવામાં આવે છે. સ્વર્ગસ્થ યોગેશ પટેલે સતત આઠ વખત આ બેઠક પરથી વિજય મેળવ્યો હતો. તેમના અવસાન બાદ હવે ભાજપમાં ઉમેદવારી માટે અનેક નામોની ચર્ચા શરૂ થઈ છે.
ચર્ચામાં રહેલા નામોમાં પૂર્વ શહેર પ્રમુખ વિજય શાહ, પૂર્વ મેયર નિલેશ રાઠોડ, પૂર્વ કોર્પોરેટર ઘનશ્યામ પટેલ તેમજ સ્વર્ગસ્થ યોગેશ પટેલ સાથે લાંબા સમયથી જોડાયેલા મયંક પટેલનો પણ સમાવેશ થાય છે.
આગામી વર્ષે યોજાનારી ગુજરાત વિધાનસભાની સામાન્ય ચૂંટણીને ધ્યાનમાં રાખીને આ પેટાચૂંટણીને રાજકીય રીતે મહત્વપૂર્ણ માનવામાં આવી રહી છે. ભાજપ ઉપરાંત કોંગ્રેસ અને આમ આદમી પાર્ટી પણ આ બેઠક પર પોતાની વ્યૂહરચના સાથે મેદાનમાં ઉતરે તેવી શક્યતા છે.
