ગાંધીજીના ‘એ થોટ ઓફ ધ ડે’ની રૂ.16.2 કરોડમાં હરાજી : ભારતીય ઐતિહાસિક દસ્તાવેજોનો વર્લ્ડ રેકોર્ડ
નવી દિલ્હી: મહાત્મા ગાંધીના હસ્તલિખિત વિચારોના એક દુર્લભ સંગ્રહે હરાજીના ક્ષેત્રમાં નવો વિશ્વ રેકોર્ડ બનાવ્યો છે. બુધવારે યોજાયેલી સેફ્રોનઆર્ટની હરાજીમાં ગાંધીજીનું હસ્તલિખિત લખાણ **‘એ થોટ ઓફ ધ ડે’ રૂ.16.2 કરોડ (1.7 મિલિયન ડોલર)**માં વેચાયું હતું.
આ સાથે ભારતીય ઐતિહાસિક દસ્તાવેજોની હરાજીમાં અત્યાર સુધીની રેકોર્ડ કિંમત નોંધાઈ છે. આશરે 23 મહિનાના સમયગાળા દરમિયાન લખાયેલા આ દસ્તાવેજમાં ગાંધીજીના 688 વિચારોનો સમાવેશ થાય છે.
હિંગોરાણી માટે લખ્યા હતા 688 વિચારો
આ વિચારો ગાંધીજીએ પોતાના અંગત સાથી, શિષ્ય અને પ્રકાશક આનંદ ટી. હિંગોરાણી માટે લખ્યા હતા. હિંગોરાણી માત્ર 13 વર્ષની ઉંમરે ગાંધીજીના અનુયાયી બન્યા હતા અને સ્વાતંત્ર્ય આંદોલન દરમિયાન તેમની સાથે જોડાયેલા રહ્યા હતા. તેમણે ઐતિહાસિક દાંડી કૂચમાં પણ ભાગ લીધો હતો.
જેલવાસ દરમિયાન હિંગોરાણીની શ્રવણશક્તિ ગુમ થઈ હતી. આ સમયગાળા દરમિયાન ગાંધીજીએ તેમના માટે પોતાના વિચારો એકત્રિત કરીને લખ્યા હતા.
ગાંધીવિચારના જતનમાં જીવન સમર્પિત કર્યું
આનંદ હિંગોરાણીએ ગાંધીજીના વિચારો અને સાહિત્યને સાચવવા માટે પોતાનું સમગ્ર જીવન સમર્પિત કર્યું હતું. તેમના દ્વારા જાળવી રાખવામાં આવેલા આ ઐતિહાસિક સંગ્રહમાંથી ‘એ થોટ ઓફ ધ ડે’ હવે કરોડોની કિંમતમાં વેચાયું છે.
ગાંધીજીના હસ્તાક્ષર અને વિચારો ધરાવતો આ દસ્તાવેજ સ્વાતંત્ર્ય સંગ્રામના ઇતિહાસની દુર્લભ ધરોહર માનવામાં આવે છે. તેની રેકોર્ડબ્રેક હરાજીએ વિશ્વભરમાં ગાંધીજીના વિચારો અને ભારતીય ઐતિહાસિક દસ્તાવેજોની મહત્વતા ફરી એકવાર ઉજાગર કરી છે.
