‘વંદે માતરમ’ મુદ્દે ભાજપ-કોંગ્રેસ વચ્ચે ફરી ટકરાવ કોંગ્રેસ સ્વતંત્રતા સેનાનીઓનું અપમાન કરી રહી છેઃ અમિત શાહનો આકરો પ્રહાર

નવી દિલ્હી: ‘વંદે માતરમ’ના મુદ્દે ભાજપ અને કોંગ્રેસ વચ્ચે રાજકીય વિવાદ વકર્યો છે. કેન્દ્રીય ગૃહમંત્રી અમિત શાહે કોંગ્રેસના વલણને ‘દેશવિરોધી’ ગણાવી આકરા પ્રહાર કર્યા છે. તેમણે આરોપ લગાવ્યો કે 1937માં કોંગ્રેસે મુસ્લિમ તુષ્ટીકરણ અને વોટબેંકની રાજનીતિને કારણે રાષ્ટ્રગીત ‘વંદે માતરમ’ને બે ભાગમાં વહેંચવાનો નિર્ણય લીધો હતો.

અમિત શાહના જણાવ્યા મુજબ, આ નિર્ણયથી આગળ જતાં દેશના ભાગલા અને દ્વિ-રાષ્ટ્ર સિદ્ધાંતને બળ મળ્યું હતું. તેમણે કહ્યું કે નરેન્દ્ર મોદી સરકારે આ ઐતિહાસિક ભૂલને સુધારવા માટે સરકારી કાર્યક્રમોમાં ‘વંદે માતરમ’નું સંપૂર્ણ છ પદનું કાવ્ય 3 મિનિટ 10 સેકન્ડ સુધી ગાવાનો નિયમ બનાવ્યો છે.

કોંગ્રેસ પર શહીદોના અપમાનનો આરોપ

અમિત શાહે રાહુલ ગાંધીના નેતૃત્વ હેઠળની કોંગ્રેસ પર સંસદના કાયદાનો અનાદર કરવાનો આરોપ લગાવ્યો. તેમણે કહ્યું કે કોંગ્રેસનું આ વલણ બંકિમચંદ્ર ચટ્ટોપાધ્યાય અને દેશ માટે બલિદાન આપનારા લાખો સ્વતંત્રતા સેનાનીઓનું અપમાન છે.

કોંગ્રેસે 1937ના નિર્ણયનો બચાવ કર્યો

બીજી તરફ કોંગ્રેસે પોતાના નિર્ણયનો મજબૂત બચાવ કર્યો છે. કોંગ્રેસ મહાસચિવ કે.સી. વેણુગોપાલ અને જયરામ રમેશે જણાવ્યું કે પક્ષ 28 ઓક્ટોબર 1937ના ઐતિહાસિક પ્રસ્તાવ પર આજે પણ અડગ છે.

કોંગ્રેસના જણાવ્યા અનુસાર તે સમયે મહાત્મા ગાંધી, જવાહરલાલ નેહરુ, સરદાર પટેલ, સુભાષચંદ્ર બોઝ અને મૌલાના આઝાદ જેવા નેતાઓની હાજરીમાં તથા રવીન્દ્રનાથ ટાગોરની સલાહને ધ્યાનમાં રાખીને નિર્ણય લેવામાં આવ્યો હતો.

ભાજપ પર મુદ્દો ભટકાવવાનો આરોપ

કોંગ્રેસે કહ્યું કે ‘વંદે માતરમ’ તેમના માટે આસ્થાનો અને ભાવનાનો વિષય છે, જ્યારે ભાજપ તેને રાજકીય મુદ્દો બનાવી રહ્યું છે. કોંગ્રેસે આરોપ મૂક્યો કે સરકાર પેપર લીક, ‘ચંદા ચોરી’ અને વિદેશ નીતિની નિષ્ફળતા જેવા મુદ્દાઓ પરથી જનતાનું ધ્યાન હટાવવા માટે આ વિવાદને આગળ ધપાવી રહી છે.

‘વંદે માતરમ’ના મુદ્દે બંને પક્ષોના આક્ષેપ-પ્રતિઆક્ષેપથી રાજકીય માહોલ વધુ ગરમાયો છે.