ગુજરાત સહિત ઉત્તર-પશ્ચિમ ભારતમાં વરસાદને બ્રેક, 13થી 15 જુલાઈ વચ્ચે બંગાળની ખાડીમાં નવી સિસ્ટમ સક્રિય થવાની આગાહી
નવી દિલ્હી: મહારાષ્ટ્ર, ગુજરાત સહિતના અનેક રાજ્યોમાં ધોધમાર વરસાદ બાદ છેલ્લા બે દિવસથી ચોમાસાની ગતિ ધીમી પડી છે. ભારતીય હવામાન વિભાગના જણાવ્યા અનુસાર ઉત્તર-પશ્ચિમ ભારત તરફથી ફૂંકાતા સુકા અને ગરમ પવનોના કારણે ભેજવાળા ચોમાસાના પવનો આગળ વધી શકતા નથી, જેના કારણે વરસાદી પ્રવૃત્તિમાં નોંધપાત્ર ઘટાડો જોવા મળી રહ્યો છે.
હવામાન વિભાગના અનુમાન મુજબ આ સ્થિતિના કારણે આગામી થોડા દિવસો સુધી ગુજરાત, રાજસ્થાન, પંજાબ, હરિયાણા, દિલ્હી-એનસીઆર તેમજ પશ્ચિમ મધ્ય પ્રદેશમાં વરસાદને વિરામ મળી શકે છે. જોકે, 13થી 15 જુલાઈ દરમિયાન બંગાળની ખાડીમાં નવું લો-પ્રેશર સિસ્ટમ સર્જાવાની શક્યતા છે, જેના કારણે ચોમાસું ફરી સક્રિય બનશે અને પૂર્વથી મધ્ય ભારત સુધી સારો વરસાદી રાઉન્ડ જોવા મળી શકે છે.
નિષ્ણાતોના જણાવ્યા મુજબ અરબી સમુદ્ર અને બંગાળની ખાડીમાંથી આવતાં ભેજયુક્ત પવનો હાલ ઉત્તર-પશ્ચિમના સુકા પવનોના પ્રભાવ હેઠળ નબળા પડ્યા છે. પરિણામે વરસાદી વાદળોની રચના પર અસર થઈ રહી છે અને ચોમાસાની પ્રગતિ ધીમી પડી છે.
દેશમાં જૂન મહિનામાં સરેરાશ કરતાં નોંધપાત્ર ઓછો વરસાદ નોંધાયો હતો અને અનેક વિસ્તારોમાં 20થી 30 ટકા સુધી વરસાદની ખાધ સર્જાઈ હતી. જુલાઈની શરૂઆતમાં ભારે વરસાદના કારણે સ્થિતિમાં સુધારો થયો હતો, પરંતુ હાલ ફરી વરસાદી પ્રવૃત્તિમાં ઘટાડો નોંધાઈ રહ્યો છે.
હવામાન વિભાગના વિવિધ મોડલ્સ અનુસાર જુલાઈના બીજા પખવાડિયામાં સમગ્ર દેશમાં સરેરાશ વરસાદ રહેવાની સંભાવના છે. પૂર્વીય રાજ્યોમાં સામાન્ય કરતાં વધુ વરસાદ પડી શકે છે, જ્યારે ઉત્તર-પશ્ચિમ, પશ્ચિમ અને દક્ષિણ ભારતના કેટલાક વિસ્તારોમાં સામાન્યથી ઓછો વરસાદ રહેવાની શક્યતા વ્યક્ત કરવામાં આવી છે.
ગુજરાતમાં ચોમાસાના પ્રથમ તબક્કામાં ખાસ કરીને દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારે વરસાદ નોંધાયો હતો, જ્યારે રાજ્યના કેટલાક તાલુકાઓ હજુ પણ ઓછા વરસાદનો સામનો કરી રહ્યા છે. દેશભરમાં વરસાદની સ્થિતિમાં સુધારો થતાં અગાઉની લગભગ 40 ટકાની વરસાદી ખાધ ઘટીને અંદાજે 12થી 15 ટકા સુધી આવી ગઈ હોવાનું પણ હવામાન વિભાગના આંકડાઓ દર્શાવે છે.
