‘મેક ઇન ઇન્ડિયા’ને મળશે વેગ, ઉત્પાદન માટે ભારતીય કંપનીઓ સાથે રાફેલની ચર્ચા
નવી દિલ્હી: ભારતના સંરક્ષણ ક્ષેત્ર માટે મહત્વપૂર્ણ વિકાસ સામે આવ્યો છે. ઇઝરાયલની અગ્રણી સંરક્ષણ કંપની રાફેલ એડવાન્સ્ડ ડિફેન્સ સિસ્ટમ્સ ભારતમાં આયર્ન ડોમ ઇન્ટરસેપ્ટર મિસાઇલોના ઉત્પાદન માટે આયોજન કરી રહી છે. આ માટે કંપની અનેક ભારતીય સંરક્ષણ ઉત્પાદક કંપનીઓ સાથે ભાગીદારી અંગે ચર્ચા કરી રહી છે.
યોજના અમલમાં આવશે તો ઇઝરાયલ અને અમેરિકા બાદ ભારત આયર્ન ડોમ ઇન્ટરસેપ્ટર મિસાઇલનું ઉત્પાદન કરતો વિશ્વનો ત્રીજો દેશ બનશે. આ પહેલ ભારત સરકારની ‘મેક ઇન ઇન્ડિયા’ અને ‘આત્મનિર્ભર ભારત’ પહેલને વધુ મજબૂત બનાવશે.
છેલ્લા કેટલાક વર્ષોથી ભારત વિદેશી સંરક્ષણ કંપનીઓને દેશમાં ઉત્પાદન એકમો સ્થાપવા અને સ્થાનિક ઉદ્યોગો સાથે ટેક્નોલોજી ભાગીદારી કરવા પ્રોત્સાહન આપી રહ્યું છે. રાફેલની આ યોજના સફળ થશે તો ભારતની સંરક્ષણ ઉત્પાદન ક્ષમતા અને સ્વદેશી ઉત્પાદનને નોંધપાત્ર વેગ મળશે.
હાલમાં આયર્ન ડોમ ઇન્ટરસેપ્ટર મિસાઇલનું ઉત્પાદન ઉત્તર ઇઝરાયલમાં કરવામાં આવે છે, જ્યારે અમેરિકામાં રેથિયોન સાથેની ભાગીદારી હેઠળ બીજી ઉત્પાદન લાઇન કાર્યરત છે. હવે ભારતમાં ઉત્પાદન શરૂ થતાં વૈશ્વિક સપ્લાય ચેઇન વધુ મજબૂત બનશે અને વધતી આંતરરાષ્ટ્રીય માંગને ઝડપથી પહોંચી વળવામાં મદદ મળશે.
ભારતમાં ઉત્પાદન થવાથી ખર્ચમાં ઘટાડો થવાની સાથે દેશના સંરક્ષણ ઉદ્યોગને નવી ટેક્નોલોજી અને રોજગારીની તકો મળશે. ઉપરાંત, ભવિષ્યમાં ભારતમાંથી મિત્ર દેશોને આ મિસાઇલોના નિકાસ માટે પણ નવા દ્વાર ખુલવાની શક્યતા છે.
