વિશાળ ખડક તૂટી પડતાં કામદારો કાટમાળ નીચે દટાયા; બચાવ કામગીરી બાદ મૃતદેહો બહાર કાઢાયા, તપાસ શરૂ
બેંગલુરુ: કર્ણાટકની રાજધાની બેંગલુરુમાં બુધવારે સવારે પથ્થરની ખાણમાં થયેલા ભૂસ્ખલનના ગમખ્વાર અકસ્માતમાં બિહારના સાત શ્રમિકોના કરુણ મોત થયા છે. તવરેકેરે પોલીસ સ્ટેશન વિસ્તારમાં આવેલી ખાણમાં અચાનક વિશાળ ખડક તૂટી પડતાં કામદારો કાટમાળ નીચે દટાઈ ગયા હતા.
માહિતી મળતા જ પોલીસ, ફાયર બ્રિગેડ અને બચાવ દળો તાત્કાલિક ઘટનાસ્થળે પહોંચી ગયા હતા અને યુદ્ધના ધોરણે રેસ્ક્યુ ઓપરેશન શરૂ કર્યું હતું. લાંબી બચાવ કામગીરી બાદ કાટમાળમાંથી તમામ મૃતદેહો બહાર કાઢવામાં આવ્યા હતા.
પ્રાથમિક તપાસ મુજબ અકસ્માત સમયે શ્રમિકો રોજિંદી કામગીરીમાં વ્યસ્ત હતા. અચાનક થયેલા ભૂસ્ખલનથી વિશાળ ખડક તેમના પર તૂટી પડ્યો હતો, જેના કારણે તેઓને બચવાની તક મળી નહોતી.
અધિકારીઓના જણાવ્યા અનુસાર, અકસ્માતમાં જીવ ગુમાવનારા તમામ સાત શ્રમિકો મૂળ બિહારના રહેવાસી હોવાનું સામે આવ્યું છે. મૃતકોની ઓળખની સત્તાવાર પ્રક્રિયા ચાલુ છે. મૃતદેહોને પોસ્ટમોર્ટમ માટે હોસ્પિટલ ખસેડવામાં આવ્યા છે અને તેમના પરિવારજનોને જાણ કરવાની કાર્યવાહી હાથ ધરાઈ છે.
અકસ્માત બાદ ખાણમાં કામ કરતા અન્ય તમામ શ્રમિકોને સુરક્ષિત રીતે બહાર કાઢવામાં આવ્યા હતા. વધુ કોઈ અનિચ્છનીય ઘટના ન બને તે માટે સમગ્ર વિસ્તારને સીલ કરીને સુરક્ષા વ્યવસ્થા ગોઠવવામાં આવી છે.
પ્રશાસને અકસ્માતના ચોક્કસ કારણોની તપાસ શરૂ કરી છે. ભૂસ્ખલન કુદરતી કારણોસર થયું હતું કે ખાણમાં સલામતીના નિયમોના પાલનમાં બેદરકારી રાખવામાં આવી હતી તે અંગે તપાસ બાદ જ સ્પષ્ટતા થશે.
