વડોદરા: શહેરના વ્યસ્ત ફતેગંજ બ્રિજ પર ફરી એકવાર કોર્પોરેશનના કોંક્રિટ ડમ્પરે અકસ્માત સર્જતાં ત્રણ વાહનોને અડફેટે લીધા હતા. સદનસીબે ઘટનામાં કોઈ જાનહાનિ નોંધાઈ નથી, પરંતુ વાહનોને ભારે નુકસાન પહોંચતાં વાહનચાલકોમાં રોષ ફેલાયો છે.
મળતી માહિતી મુજબ, કોર્પોરેશનનો કોંક્રિટ ભરેલો ડમ્પર બ્રિજ પરથી પસાર થઈ રહ્યો હતો ત્યારે અચાનક નિયંત્રણ ગુમાવતા આગળ જઈ રહેલા ત્રણ વાહનો સાથે અથડાયો હતો. અકસ્માત બાદ બ્રિજ પર થોડા સમય માટે અફરાતફરીનો માહોલ સર્જાયો હતો.
આ ઘટનાના કારણે ફતેગંજ બ્રિજ પર ટ્રાફિક વ્યવહાર પણ પ્રભાવિત થયો હતો. પોલીસ અને ટ્રાફિક વિભાગે તાત્કાલિક સ્થળ પર પહોંચી વાહનો હટાવી ટ્રાફિક પૂર્વવત્ કરવાનો પ્રયાસ કર્યો હતો.
ઉલ્લેખનીય છે કે, છેલ્લા એક સપ્તાહમાં ફતેગંજ બ્રિજ પર કોર્પોરેશનના ડમ્પરથી અકસ્માતની આ બીજી ઘટના છે. સતત બની રહેલા આવા બનાવોને લઈને સ્થાનિકો અને વાહનચાલકોમાં ચિંતા વધી છે.
વાહનચાલકોએ તંત્ર સમક્ષ ફતેગંજ બ્રિજ પર ભારે વાહનોની અવરજવર પર પ્રતિબંધ મૂકવાની માંગ ઉઠાવી છે. તેમનું કહેવું છે કે વારંવાર થતા અકસ્માતોને અટકાવવા માટે તાત્કાલિક અસરકારક પગલાં ભરવાની જરૂર છે.
