વડોદરા: વડોદરા જિલ્લાના પાદરા પોલીસે ₹2.16 કરોડની બિટકોઇન રોકાણ છેતરપિંડી કેસમાં લાંબા સમયથી ફરાર મુખ્ય આરોપીની બેંગલુરુમાંથી ધરપકડ કરી છે. છેલ્લા છ મહિનાથી પોલીસથી બચી ફરતા આરોપીને ઝડપી લેતા તપાસમાં મહત્વપૂર્ણ કડીઓ મળવાની આશા વ્યક્ત કરવામાં આવી રહી છે.
પકડાયેલ આરોપીની ઓળખ જોસેફ સેમ્યુઅલ મેકવાન તરીકે થઈ છે, જે મિકેનિકલ ડિપ્લોમાધારક હોવાનું સામે આવ્યું છે. પોલીસ તપાસ મુજબ, તેણે બિટકોઇનમાં રોકાણ કરનારાઓને ટૂંકા સમયમાં મોટું વળતર આપવાની લાલચ આપી કરોડો રૂપિયાની છેતરપિંડી આચરી હતી.
પ્રાથમિક તપાસમાં જાણવા મળ્યું છે કે આરોપીએ 36 જેટલા રોકાણકારો પાસેથી કુલ ₹2.16 કરોડની રકમ ઉઘરાવી હતી. રોકાણ પર આકર્ષક નફાની ખાતરી આપ્યા બાદ પૈસા મેળવી આરોપી ફરાર થઈ ગયો હતો.
પાદરા પોલીસે ગુપ્ત બાતમી અને ટેકનિકલ સર્વેલન્સના આધારે બેંગલુરુમાં સફળ ઓપરેશન ચલાવી આરોપીને ઝડપી પાડ્યો હતો. ત્યારબાદ તેને કોર્ટમાં રજૂ કરવામાં આવ્યો હતો, જ્યાંથી 5 દિવસના પોલીસ રિમાન્ડ મંજૂર કરવામાં આવ્યા છે.
પોલીસ હવે આરોપીની પૂછપરછના આધારે છેતરપિંડીમાં અન્ય કોઈ વ્યક્તિ સંડોવાયેલી છે કે નહીં, રોકાણની રકમ ક્યાં વાપરવામાં આવી અને સમગ્ર નેટવર્ક કેવી રીતે કાર્યરત હતું તે સહિતના મુદ્દાઓની ઊંડાણપૂર્વક તપાસ કરી રહી છે.
