જાપાનમાં યોજાનારી આગામી એશિયન ગેમ્સમાં ભારતીય ક્રિકેટ ટીમો ગોલ્ડ મેડલ જીતવાના લક્ષ્ય સાથે મેદાનમાં ઉતરશે. ભારતીય મહિલા ટીમ 18 સપ્ટેમ્બરે યજમાન જાપાન સામે પ્રથમ મેચ રમશે, જ્યારે પુરુષ ટીમ 28 સપ્ટેમ્બરથી પોતાના અભિયાનની શરૂઆત કરશે. ભારતની બંને ટીમોને રેન્કિંગના આધારે સીધો ક્વાર્ટર ફાઈનલમાં પ્રવેશ મળ્યો છે.
શ્રેયસ અય્યરની આગેવાની હેઠળની પુરુષ ટીમ અને હરમનપ્રીત કૌરની આગેવાની હેઠળની મહિલા ટીમને ગોલ્ડ મેડલની મજબૂત દાવેદાર માનવામાં આવી રહી છે. અગાઉની એશિયન ગેમ્સમાં ભારતે મહિલા અને પુરુષ બંને કેટેગરીમાં ગોલ્ડ મેડલ જીતીને શાનદાર પ્રદર્શન કર્યું હતું. તેથી આ વખતે પણ ભારતીય ટીમો પાસેથી ગોલ્ડ મેડલની આશા રાખવામાં આવી રહી છે.
પુરુષ ટીમનો ક્વાર્ટર ફાઈનલમાં મુકાબલો
ભારતીય પુરુષ ટીમ ક્વાર્ટર ફાઈનલમાં ગ્રુપ-એમાં બીજા સ્થાને રહેલી ટીમ સામે રમશે. ગ્રુપ-એમાં અફઘાનિસ્તાન, જાપાન અને નેપાળનો સમાવેશ કરવામાં આવ્યો છે. નાગોયા નજીકના કોરોગી એથલેટિક પાર્કમાં ક્રિકેટની તમામ મેચો યોજાશે.
મહિલા ક્રિકેટની ફાઈનલ 22 સપ્ટેમ્બરે, જ્યારે પુરુષ ક્રિકેટની ફાઈનલ 3 ઓક્ટોબરે રમાશે. ભારતની બંને ટીમો સીધી ક્વાર્ટર ફાઈનલથી શરૂઆત કરશે, તેથી ટૂર્નામેન્ટમાં તેમનું મિશન ગોલ્ડ શરૂઆતથી જ નોકઆઉટ તબક્કામાં જોવા મળશે.
OCAએ ખેલાડીઓની સંખ્યા પર લગાવી મર્યાદા
જાપાને આગામી એશિયન ગેમ્સમાં 15 હજારથી વધુ સહભાગીઓને સમાવવા અંગે અસમર્થતા વ્યક્ત કરી છે. આ સ્થિતિને ધ્યાનમાં રાખીને ઓલિમ્પિક કાઉન્સિલ ઓફ એશિયા (OCA)એ ભારત સહિત તમામ રાષ્ટ્રીય ઓલિમ્પિક સમિતિઓને પોતાના દળની સંખ્યા નક્કી કરેલી મર્યાદામાં રાખવાની સલાહ આપી છે.
OCAએ છેલ્લી ઘડીએ નવા ખેલાડીઓના નામ ઉમેરવાની વિનંતી ન કરવા પણ સ્પષ્ટ સૂચના આપી છે. ભારતે એશિયન ગેમ્સ માટે આ વખતે 492 ખેલાડીઓને મંજૂરી આપી છે. હવે ભારતીય ક્રિકેટ ટીમો સહિત સમગ્ર ભારતીય દળ પાસેથી જાપાનમાં શાનદાર પ્રદર્શનની અપેક્ષા રાખવામાં આવી રહી છે.
