વર્લ્ડ સ્કાયડાઇવિંગ ડે પર ગિનેસમાં નોંધાયો નવો રેકોર્ડ; ગયા વર્ષની સિદ્ધિ પણ તૂટી
નવી દિલ્હી: સાહસિક રમતોના શોખીનો માટે ઉજવાતા વર્લ્ડ સ્કાયડાઇવિંગ ડે પર આ વર્ષે વિશ્વભરમાં ઐતિહાસિક સિદ્ધિ નોંધાઈ છે. માત્ર એક જ દિવસમાં 43 દેશોના કુલ 31,075 લોકોએ સ્કાયડાઇવિંગ કરીને ગિનેસ વર્લ્ડ રેકોર્ડમાં નવું સ્થાન મેળવ્યું છે.
આ અભિયાનનું આયોજન અમેરિકા, ઑસ્ટ્રેલિયા, બ્રિટન અને કેનેડાની અગ્રણી સ્કાયડાઇવિંગ સંસ્થાઓએ સંયુક્ત રીતે કર્યું હતું. વિશ્વભરના સ્કાયડાઇવિંગ સેન્ટરોમાં 11 જુલાઈના રોજ સતત 24 કલાક સુધી જમ્પ યોજાયા હતા. તેમાં અનુભવી સ્કાયડાઇવર્સ ઉપરાંત પ્રથમ વખત આ સાહસ અજમાવનારાઓએ પણ ઉત્સાહપૂર્વક ભાગ લીધો હતો.
કેટલાક સ્થળોએ સમૂહમાં જમ્પ યોજાયા, જ્યારે અનેક લોકોએ એકલાં સ્કાયડાઇવિંગ કરીને આ વૈશ્વિક અભિયાનમાં યોગદાન આપ્યું. ગયા વર્ષે 30,351 લોકોએ ભાગ લઈને વિશ્વવિક્રમ બનાવ્યો હતો, જે આ વર્ષે તૂટી ગયો.
કાર્યક્રમ દરમિયાન થયેલા તમામ સ્કાયડાઇવના વીડિયો, હાજરીના રેકોર્ડ અને અન્ય દસ્તાવેજો ગિનેસ વર્લ્ડ રેકોર્ડ્સને મોકલવામાં આવ્યા હતા. ચકાસણી પૂર્ણ થયા બાદ એક જ દિવસમાં સૌથી વધુ લોકો દ્વારા સ્કાયડાઇવિંગ કરવાનો નવો વિશ્વવિક્રમ સત્તાવાર રીતે માન્ય જાહેર કરવામાં આવ્યો.
