લોખંડની સીડીમાં ઉતરેલા કરંટની ચપેટમાં યુવક આવ્યો, બચાવવા દોડેલો મિત્ર પણ બન્યો ભોગ
સુરત: શહેરમાં ધોધમાર વરસાદ વચ્ચે રાંદેર વિસ્તારમાં એક હૃદયદ્રાવક ઘટના સામે આવી છે. વરસાદમાં નાહ્યા બાદ ઘરમાં પ્રવેશી રહેલા યુવકને લોખંડની સીડીમાં ઉતરેલા વીજ કરંટનો ઝટકો લાગતા તેનું મોત થયું હતું. તેને બચાવવા દોડેલો મિત્ર પણ કરંટની ચપેટમાં આવી જતાં બંનેના કરૂણ મોત થતાં સમગ્ર વિસ્તારમાં શોકનો માહોલ છવાઈ ગયો છે.
પ્રાપ્ત માહિતી અનુસાર, રાંદેરગામની મોટી મસ્જિદ નજીક આવેલી સુઝાતખાન સ્ટ્રીટમાં રહેતા 28 વર્ષીય આઝમ આલમ અબ્દુલ કમાલ સાંજે વરસી રહેલા ભારે વરસાદમાં બહાર નાહવા ગયા હતા. વરસાદમાં ભીના થયા બાદ તેઓ ઘરે પરત ફરી રહ્યા હતા ત્યારે લોખંડની સીડી ચઢતી વખતે તેમાં ઉતરેલા વીજ કરંટની ચપેટમાં આવી ગયા હતા. જોરદાર કરંટ લાગતા તેઓ સીડી પર જ ઢળી પડ્યા અને બૂમાબૂમ મચી ગઈ.
આઝમને કરંટ લાગ્યાની જાણ થતાં નજીકમાં રહેતા તેમના મિત્ર 43 વર્ષીય મોહમ્મદ સલમાન મોહમ્મદ ઈરશાદ શેખ તેમને બચાવવા માટે તરત જ દોડી આવ્યા હતા. જોકે ભીના શરીરના કારણે તેઓ પણ કરંટની ચપેટમાં આવી ગયા અને બંને ગંભીર રીતે ઝઝૂમીને ઘટનાસ્થળે જ ઢળી પડ્યા.
સ્થાનિક લોકો બંનેને તાત્કાલિક સારવાર માટે હોસ્પિટલ લઈ ગયા હતા, જ્યાં ફરજ પરના તબીબોએ બંનેને મૃત જાહેર કર્યા હતા. ઘટનાની જાણ થતાં પોલીસ અને વીજ વિભાગની ટીમ પણ સ્થળ પર પહોંચી હતી અને સમગ્ર ઘટનાની તપાસ શરૂ કરી છે.
આ કરૂણ ઘટનાએ સમગ્ર રાંદેર વિસ્તારમાં શોકની લાગણી ફેલાવી છે. વરસાદી મોસમ દરમિયાન વીજ ઉપકરણો અને લોખંડની વસ્તુઓની આસપાસ સાવચેતી રાખવાની જરૂરિયાત પર પણ આ ઘટનાએ ગંભીર ચેતવણી આપી છે.
