મુંબઈ: સતત નવ ટ્રેડિંગ સેશનથી ચાલી રહેલી મંદી બાદ ભારતીય શેરબજારમાં આજે જોરદાર ખરીદી જોવા મળી હતી. બજારમાં ઓલરાઉન્ડ લેવાલી થતાં સેન્સેક્સ લગભગ 700 પોઈન્ટ ઉછળ્યો હતો. બીજી તરફ સોના અને ચાંદીના ભાવમાં પણ જોરદાર તેજી નોંધાઈ હતી, જ્યારે ક્રૂડ ઓઈલનો ભાવ પણ વધીને 94 ડોલરની નજીક પહોંચી ગયો હતો.
બજારમાં શરૂઆતથી જ તેજીનો માહોલ રહ્યો હતો. હેવીવેઈટ શેરો ઉપરાંત વિવિધ ક્ષેત્રના શેરોમાં પણ ખરીદી નીકળતા બજાર સતત મજબૂત બન્યું હતું. MCX, પ્રીમિયર એનર્જી, મોતીલાલ ઓસવાલ, HDFC બેંક, યસ બેંક, સુઝલોન, બલરામપુર ચીની, ITC, ટાટા કેપિટલ અને વારી એનર્જીમાં નોંધપાત્ર સુધારો જોવા મળ્યો હતો.
બીજી તરફ REC, PFC, ભારત ડાયનેમિક્સ, GMR એરપોર્ટ્સ, BSE, વોડાફોન, સન ટીવી અને પતંજલિ સહિત કેટલાક શેરોમાં ઘટાડો નોંધાયો હતો.
સેન્સેક્સ 647 પોઈન્ટ વધ્યો
સેન્સેક્સ 647 પોઈન્ટના ઉછાળા સાથે 77,557ના સ્તરે રહ્યો હતો. દિવસ દરમિયાન સેન્સેક્સ 77,611ની ઊંચી અને 77,371ની નીચી સપાટીએ પહોંચ્યો હતો.
નિફ્ટીમાં પણ 157 પોઈન્ટનો વધારો થયો હતો અને તે 24,235ના સ્તરે પહોંચ્યો હતો. નિફ્ટીએ દિવસ દરમિયાન 24,265ની ઊંચી અને 24,184ની નીચી સપાટી નોંધાવી હતી.
સોનામાં રૂ.4,000 અને ચાંદીમાં રૂ.10,000નો ઉછાળો
વૈશ્વિક બજારમાં સોનું 4,493 ડોલરના સ્તરે હતું. સ્થાનિક હાજર બજારમાં સોનાના ભાવ રૂ.4,000 વધીને રૂ.1,61,700 થયા હતા, જ્યારે વાયદામાં ભાવ રૂ.1,58,275 રહ્યા હતા.
ચાંદીમાં પણ રોકાણકારોની લેવાલી વધતાં હાજર ભાવ રૂ.10,000ના ઉછાળા સાથે રૂ.2,44,900 પ્રતિ કિલો થયા હતા. વાયદામાં ચાંદી રૂ.2,38,865ના સ્તરે રહી હતી. વૈશ્વિક બજારમાં ચાંદીનો ભાવ 66.60 ડોલર હતો.
ક્રૂડ ઓઈલ પણ 94 ડોલરની નજીક
વૈશ્વિક બજારમાં ક્રૂડ ઓઈલના ભાવમાં પણ વધારો થયો હતો. WTI ક્રૂડ 86.42 ડોલર અને બ્રેન્ટ ક્રૂડ 93.83 ડોલરના સ્તરે પહોંચ્યું હતું.
ગઈ રાત્રે વૈશ્વિક બજારમાં ટ્રેન્ડમાં આવેલા અચાનક પલટાની અસર ભારતીય બજારો પર જોવા મળી હતી. શેરબજાર, સોનું-ચાંદી અને ક્રૂડ ઓઈલમાં એકસાથે તેજી આવતા રોકાણકારોનું સેન્ટિમેન્ટ સુધર્યું હતું.
