છોટાઉદેપુર જિલ્લાના નસવાડી તાલુકામાં ફસાયેલા એક નાગરિકને રાષ્ટ્રીય આપદા પ્રતિસાદ દળ (NDRF) દ્વારા સફળતાપૂર્વક બચાવી લેવામાં આવ્યો છે. મળતી માહિતી મુજબ, વાલપુરા ગામના રહેવાસી ભીલ સતીશ કાંતી (ઉંમર 34 વર્ષ) મુશ્કેલીમાં ફસાયા હોવાની જાણ થતાં એનડીઆરએફની ટીમ તાત્કાલિક એક્શનમાં આવી હતી.
ઇન્સ્પેક્ટર બ્રિજેશ વિશ્વકર્માના નેતૃત્વ હેઠળ NDRF ટીમ 6B ઘટનાસ્થળે પહોંચી હતી અને પરિસ્થિતિનું મૂલ્યાંકન કર્યા બાદ રેસ્ક્યુ ઓપરેશન શરૂ કરવામાં આવ્યું હતું. ટીમે ઝડપી અને સુનિયોજિત કામગીરી હાથ ધરી ભીલ સતીશ કાંતીને સુરક્ષિત રીતે બહાર કાઢવામાં સફળતા મેળવી હતી.
રેસ્ક્યુ ઓપરેશન દરમિયાન સ્થાનિક તંત્ર અને NDRF વચ્ચે સંકલન જોવા મળ્યું હતું. સમયસર હાથ ધરાયેલી કામગીરીને કારણે કોઈ જાનહાનિ થઈ નહોતી અને નાગરિકને સુરક્ષિત સ્થળે ખસેડવામાં આવ્યો હતો.
આ ઘટનાએ ફરી એકવાર આપત્તિના સમયમાં NDRFની સતર્કતા અને કાર્યક્ષમતાને ઉજાગર કરી છે. સ્થાનિક લોકોએ પણ NDRFની ટીમના ઝડપી પ્રતિસાદ અને સફળ બચાવ કામગીરીની પ્રશંસા કરી હતી.
