વડોદરા: મધ્ય ગુજરાત સ્થિત VGRC ખાતે ‘આત્મનિર્ભર ભારત ઇન એરોસ્પેસ એન્ડ ડિફેન્સ’ વિષયક સેમિનારનું આયોજન કરવામાં આવ્યું હતું. કાર્યક્રમમાં કેન્દ્રીય સંરક્ષણ મંત્રી રાજનાથ સિંહની ઉપસ્થિતિમાં એરોસ્પેસ અને ડિફેન્સ ક્ષેત્રના વિકાસને નવી દિશા આપતા મહત્વપૂર્ણ કરારો કરવામાં આવ્યા હતા.
સેમિનાર દરમિયાન સંરક્ષણ ક્ષેત્ર સાથે સંકળાયેલી ચાર અગ્રણી કંપનીઓએ કુલ ₹2,550 કરોડના રોકાણ માટે રાજ્ય સરકાર સાથે સમજૂતી કરાર (MoU) પર હસ્તાક્ષર કર્યા હતા. આ રોકાણથી રાજ્યમાં ડિફેન્સ અને એરોસ્પેસ મેન્યુફેક્ચરિંગને પ્રોત્સાહન મળશે તેવી આશા વ્યક્ત કરવામાં આવી હતી.
કાર્યક્રમમાં જણાવાયું હતું કે આ પ્રસ્તાવિત રોકાણના પરિણામે આગામી વર્ષોમાં 4 હજારથી વધુ લોકોને સીધી અને પરોક્ષ રોજગારી ઉપલબ્ધ થવાની સંભાવના છે. ઉપરાંત સ્થાનિક ઉદ્યોગોને પણ નવી તકો મળશે અને રાજ્યના ઔદ્યોગિક વિકાસને વધુ વેગ મળશે.
વક્તાઓએ ભારપૂર્વક જણાવ્યું હતું કે ‘આત્મનિર્ભર ભારત’ના વિઝનને સાકાર કરવામાં એરોસ્પેસ અને ડિફેન્સ ક્ષેત્રની મહત્વપૂર્ણ ભૂમિકા રહેશે. ગુજરાતે રોકાણ, આધુનિક ઈન્ફ્રાસ્ટ્રક્ચર અને અનુકૂળ ઔદ્યોગિક નીતિઓના કારણે આ ક્ષેત્રમાં દેશના અગ્રણી રાજ્ય તરીકે પોતાની ઓળખ મજબૂત બનાવી છે.
