સામાન્ય ઉપયોગ મફત રહેશે; બિઝનેસ અને કન્ટેન્ટ ક્રિએટર્સ માટે વધારાની સુવિધાઓ સાથે માસિક સબસ્ક્રિપ્શન
નવી દિલ્હી: મેટાએ ભારતમાં પોતાના સોશિયલ મીડિયા પ્લેટફોર્મ ફેસબુક, ઇન્સ્ટાગ્રામ અને વોટસએપ માટે પેઈડ સબસ્ક્રિપ્શન પ્લાન રજૂ કર્યા છે. જોકે, આ નિર્ણયથી સામાન્ય યુઝર્સ માટે ત્રણેય પ્લેટફોર્મ સંપૂર્ણપણે પેઈડ થવાના નથી. વધારાની સુવિધાઓ મેળવવા ઇચ્છતા યુઝર્સ, ખાસ કરીને બિઝનેસ અને કન્ટેન્ટ ક્રિએટર્સ, સબસ્ક્રિપ્શન લઈ શકશે.
મેટાના નવા પ્લાનમાં અલગ-અલગ સ્તરના વિકલ્પો આપવામાં આવ્યા છે. તેમાં AI આધારિત સુવિધાઓ, વધારાના બિઝનેસ ટૂલ્સ, એકાઉન્ટ સુરક્ષા અને અન્ય પ્રીમિયમ ફીચર્સનો સમાવેશ થાય છે. કેટલાક પ્લાનમાં ત્રણેય પ્લેટફોર્મની સુવિધાઓ એક જ સબસ્ક્રિપ્શનમાં મેળવવાની વ્યવસ્થા કરવામાં આવી છે.
બિઝનેસ અને કન્ટેન્ટ ક્રિએટર્સને ગ્રાહકો સુધી પહોંચવા, કન્ટેન્ટ મેનેજ કરવા, ઓડિયન્સ સંબંધિત માહિતી મેળવવા અને એકાઉન્ટને સુરક્ષિત રાખવા માટે વધારાની સુવિધાઓ મળશે. મેટાએ અલગ-અલગ જરૂરિયાત મુજબ અનેક સબસ્ક્રિપ્શન વિકલ્પો ઉપલબ્ધ કરાવ્યા છે.
અગાઉથી જ વોટસએપ, ફેસબુક અને ઇન્સ્ટાગ્રામ પર બિઝનેસ માટે પેઈડ અને વેરિફિકેશન આધારિત સેવાઓ ઉપલબ્ધ છે. હવે મેટાના નવા પ્લાનથી AI સહિતની પ્રીમિયમ સુવિધાઓને વધુ વ્યાપક રીતે સબસ્ક્રિપ્શન મોડલ સાથે જોડવામાં આવી રહી છે.
