વડાપ્રધાન નરેન્દ્ર મોદીના 15 ઓગસ્ટના સ્વતંત્રતા દિવસના સંબોધનમાં ‘દિમાગી નક્સલ’ શબ્દના ઉપયોગ બાદ સોશિયલ મીડિયામાં આ નામને લઈને નવું ડિજિટલ કેમ્પેઇન ચર્ચામાં આવ્યું છે.
‘કોકરોચ જનતા પાર્ટી’ બાદ હવે સોશિયલ મીડિયા પર ‘દિમાગી નક્સલ જનતા પાર્ટી’ અને ‘દિમાગી નક્સલ પાર્ટી’ નામે એકાઉન્ટ્સ બનાવવામાં આવ્યા છે. Instagram પર આવા એક એકાઉન્ટે માત્ર 24 કલાકમાં 1.9 લાખથી વધુ ફોલોઅર્સ મેળવ્યા હોવાનો દાવો છે.
કેમ્પેઇનનું સ્લોગન ‘સોચો, રિસર્ચ કરો, વિરોધ કરો’ રાખવામાં આવ્યું છે. આ અભિયાન દ્વારા રાજકીય અને સામાજિક મુદ્દાઓ પર સવાલ ઉઠાવવાનો સંદેશ આપવામાં આવી રહ્યો છે. સંબંધિત સોશિયલ મીડિયા એકાઉન્ટ્સ રાહુલ ગાંધી, અખિલેશ યાદવ, અરવિંદ કેજરીવાલ, ધ્રુવ રાઠી અને કુણાલ કામરા જેવા જાણીતા ચહેરાઓને ફોલો કરે છે.
આ મહિને જ શરૂ થયેલા આ એકાઉન્ટના સંચાલકની ઓળખ હજુ સુધી સામે આવી નથી. PM મોદીએ લાલ કિલ્લા પરથી સંબોધન દરમિયાન કહ્યું હતું કે જંગલોમાં હથિયાર ઉઠાવનારા નક્સલવાદીઓ નબળા પડ્યા છે, પરંતુ ‘દિમાગી નક્સલ’ દેશને ખોટા રસ્તે દોરવાનો પ્રયાસ કરી રહ્યા છે અને તેમનાથી સાવચેત રહેવાની જરૂર છે.
PM મોદીના આ નિવેદન બાદ વિપક્ષ તરફથી પણ પ્રતિક્રિયાઓ સામે આવી છે. કોંગ્રેસના વરિષ્ઠ નેતા પી. ચિદમ્બરમે કહ્યું કે જો સરકાર તેમને ‘દિમાગી નક્સલ’ કહે છે તો તેમને આ સંબોધન પર ગર્વ છે.
જ્યારે કેન્દ્રીય મંત્રી કિરેન રિજિજુએ સ્પષ્ટતા કરી કે આ શબ્દ એવા લોકો માટે વપરાયો છે, જેઓ માઓવાદીઓનું સમર્થન કરે છે, ભારતીય બંધારણને સ્વીકારતા નથી અને અલગાવવાદીઓ સાથે ઊભા રહે છે.
હવે ‘દિમાગી નક્સલ’ શબ્દ રાજકીય નિવેદનથી આગળ વધીને સોશિયલ મીડિયા પર નવા ડિજિટલ કેમ્પેઇનનું સ્વરૂપ લઈ રહ્યો છે.
