દેશમાં દક્ષિણ-પશ્ચિમ ચોમાસું હવે ધીમે-ધીમે વિદાય તરફ આગળ વધી રહ્યું છે. જૂન મહિનાથી અત્યાર સુધી દેશમાં સામાન્ય કરતાં 13 ટકા ઓછો વરસાદ નોંધાયો છે. પશ્ચિમ અને મધ્ય ભારતના કેટલાક વિસ્તારોમાં વરસાદ સંતોષકારક રહ્યો છે, પરંતુ ગંગાના મેદાની વિસ્તારો, ઉત્તર-પૂર્વ અને દક્ષિણ ભારતમાં વરસાદની ખાધ યથાવત છે.
હવામાનમાં મોટા ફેરફારના કારણે ઉત્તર-પશ્ચિમ ભારતમાંથી ભેજવાળા ચોમાસાના પવનો નબળા પડી રહ્યા છે અને હવે સૂકા ઉત્તર-પશ્ચિમી પવનો આગળ વધી રહ્યા છે. ચોમાસાની ટ્રફ પણ હિમાલયની તળેટી તરફ ખસી ગઈ છે, જે મેદાની વિસ્તારોમાં ચોમાસું નબળું પડવાનો મહત્વપૂર્ણ સંકેત માનવામાં આવે છે.
આગામી દિવસોમાં પંજાબ, હરિયાણા, દિલ્હી-NCR અને રાજસ્થાન સહિત ઉત્તર-પશ્ચિમ ભારતમાં વરસાદી પ્રવૃત્તિમાં મોટો ઘટાડો થવાની શક્યતા છે. જોકે, ભેજવાળા પવનો ઘટતાં બફારામાંથી લોકોને રાહત મળશે અને વાતાવરણમાં ઠંડક અનુભવાશે.
ઓછા વરસાદની અસર ઉત્તર પ્રદેશ, બિહાર, ઝારખંડ, કર્ણાટક અને ઉત્તર-પૂર્વના કેટલાક રાજ્યોમાં ખેતી પર પડી શકે છે. જમીનમાં ભેજની અછત પાક માટે ચિંતાજનક બની શકે છે.
હવે સૌની નજર બંગાળની ખાડી પર છે. જો ત્યાં નવું લો-પ્રેશર સર્જાય અને તે દેશના આંતરિક વિસ્તારો તરફ આગળ વધે, તો ઉત્તર અને પશ્ચિમ ભારતમાં ફરી વરસાદનો દોર શરૂ થવાની શક્યતા છે.
