દિલ્હી સહિત મહારાષ્ટ્ર, કર્ણાટક અને પશ્ચિમ બંગાળમાં H1N1ના કેસ વધતાં આરોગ્ય તંત્રને સતર્ક રહેવા સૂચના
નવી દિલ્હી: દેશના અનેક રાજ્યોમાં ઇન્ફ્લુએન્ઝા-એચ1એન1 એટલે કે સ્વાઇન ફ્લુના કેસમાં વધારો નોંધાતા આરોગ્ય તંત્ર સતર્ક બન્યું છે. દિલ્હી સહિત વિવિધ વિસ્તારોમાં સંક્રમણના કેસ સામે આવ્યા બાદ ઇન્ડિયન મેડિકલ એસોસિએશન (IMA) દ્વારા દેશભરમાં એડવાઇઝરી જાહેર કરી લોકોને સાવચેતી રાખવા અપીલ કરવામાં આવી છે.
IMAના જણાવ્યા મુજબ, મોસમી પરિબળો અને વાતાવરણમાં આવેલા ફેરફારોને કારણે H1N1 વાયરસનો ફેલાવો વધી રહ્યો છે. દિલ્હી ઉપરાંત મહારાષ્ટ્ર, કર્ણાટક અને પશ્ચિમ બંગાળમાં પણ સ્વાઇન ફ્લુના કેસ સામે આવ્યા છે. સ્થિતિને ધ્યાનમાં રાખીને તમામ રાજ્યોના આરોગ્ય વિભાગોને પણ જરૂરી તકેદારી રાખવા અને સંક્રમણ પર નજર રાખવા સૂચના આપવામાં આવી છે.
જોકે તબીબી નિષ્ણાતોના જણાવ્યા મુજબ H1N1 કોઈ નવો વાયરસ નથી. અગાઉ પણ આ વાયરસના સંક્રમણના કેસ નોંધાઈ ચૂક્યા છે અને હાલના વાયરસમાં કોઈ નવા ગંભીર મ્યુટેશનની માહિતી સામે આવી નથી. તેથી હાલ ગભરાવાની જરૂર નથી, પરંતુ વાયરસના ફેલાવાને ધ્યાનમાં રાખીને સાવચેતી રાખવી જરૂરી છે.
નિષ્ણાતોના જણાવ્યા અનુસાર વાયરસમાં સમય જતાં મ્યુટેશન થવાની શક્યતા રહેતી હોવાથી તેની સ્થિતિ પર સતત નજર રાખવી જરૂરી છે. લોકોને તાવ, ઉધરસ, ગળામાં દુખાવો, શરીરમાં દુખાવો અથવા શ્વાસ લેવામાં તકલીફ જેવા લક્ષણો જણાય તો તેને સામાન્ય ફ્લુ માનીને અવગણવાને બદલે સમયસર તબીબી તપાસ અને સારવાર લેવાની સલાહ આપવામાં આવી છે.
IMA દ્વારા ખાસ કરીને વૃદ્ધો, નાના બાળકો અને અન્ય જોખમ ધરાવતા લોકોની વધુ કાળજી રાખવા અપીલ કરવામાં આવી છે. આરોગ્ય વિભાગોને પણ સંક્રમણના કેસ અંગે સતત દેખરેખ રાખવા અને જરૂરિયાત મુજબ તાત્કાલિક સારવારની વ્યવસ્થા કરવા સૂચના આપવામાં આવી છે.
દેશના વિવિધ વિસ્તારોમાં H1N1ના કેસ વધતાં હાલમાં આરોગ્ય તંત્ર દ્વારા સ્થિતિ પર નજર રાખવામાં આવી રહી છે. નિષ્ણાતોનું કહેવું છે કે યોગ્ય સાવચેતી અને સમયસર સારવારથી સ્વાઇન ફ્લુના ફેલાવાને નિયંત્રિત કરી શકાય છે.
