જેતપુર: રાજકોટ જિલ્લાના જેતપુર શહેરના કણકીયા પ્લોટ વિસ્તારમાં એક યુવાનની જાહેરમાં છરીના ઘા ઝીંકીને કરૂણ હત્યા કરવામાં આવતા સમગ્ર વિસ્તારમાં ભય અને ચકચારનો માહોલ સર્જાયો છે. મૃતકની ઓળખ કમલેશ વાઘેલા તરીકે થઈ છે.
પ્રાથમિક માહિતી મુજબ, અજાણ્યા શખ્સોએ કમલેશ વાઘેલા પર જીવલેણ હુમલો કરી છરીના અનેક ઘા ઝીંક્યા હતા. ગંભીર રીતે ઘાયલ થયેલા કમલેશનું ઘટનાસ્થળે જ મોત થયું હોવાનું સામે આવ્યું છે.
સમગ્ર હત્યાકાંડ નજીકમાં લાગેલા CCTV કેમેરામાં કેદ થઈ ગયો છે. પોલીસે CCTV ફૂટેજ કબજે કરીને આરોપીઓની ઓળખ અને તેમની હિલચાલ અંગે તપાસ શરૂ કરી છે. અન્ય ટેક્નિકલ પુરાવાઓના આધારે પણ આરોપીઓને ઝડપી પાડવા માટે અલગ-અલગ ટીમો કામે લાગી છે.
હત્યાની ઘટનાને પગલે જેતપુર શહેરમાં ભારે ચકચાર મચી ગઈ છે. ઘટનાની જાણ થતાં પોલીસનો કાફલો સ્થળ પર પહોંચી ગયો હતો અને મૃતદેહને પોસ્ટમોર્ટમ માટે મોકલી આગળની કાયદેસરની કાર્યવાહી હાથ ધરી છે.
પોલીસનું કહેવું છે કે હત્યા પાછળનું ચોક્કસ કારણ હજુ સ્પષ્ટ થયું નથી. જોકે, તમામ સંભવિત દિશામાં તપાસ ચાલી રહી છે અને ટૂંક સમયમાં આરોપીઓને ઝડપી પાડવામાં આવશે તેવી આશા વ્યક્ત કરવામાં આવી છે.
