રાજકોટ નજીકના સરધાર ગામમાં યુવતી સાથે થયેલા કથિત અપહરણ, દુષ્કર્મ અને ખંડણીના ગંભીર કેસે સમગ્ર વિસ્તારમાં ચકચાર મચાવી છે. કચ્છની એક યુવતીએ આજી ડેમ પોલીસ મથકમાં નોંધાવેલી ફરિયાદમાં જણાવ્યું છે કે આરોપી રામ છૈયાએ તેનું અપહરણ કરી તેને સરધાર સ્થિત પોતાના ઘરે સવા બે મહિના સુધી ગોંધી રાખી હતી.
ફરિયાદ અનુસાર, આ દરમિયાન આરોપીએ યુવતી પર વારંવાર દુષ્કર્મ આચર્યું હતું. એટલું જ નહીં, યુવતીને મુક્ત કરાવવા માટે તેના પિતા પાસેથી 20 લાખ રૂપિયાની ખંડણીની માંગણી પણ કરવામાં આવી હતી. પીડિતાના જણાવ્યા મુજબ, આરોપીઓ દ્વારા સતત ધમકીઓ આપવામાં આવતી હતી અને તેને બહારની દુનિયા સાથે સંપર્ક સાધવા દેવામાં આવતો ન હતો.
ઘટનાનો ભાંડો ત્યારે ફૂટ્યો જ્યારે પીડિતાના ભાઈએ ભારે જહેમત બાદ સરધાર ખાતે પહોંચીને રૂમનો દરવાજો તોડી પોતાની બહેનને મુક્ત કરાવી હતી. સમગ્ર મામલો સામે આવતા પોલીસ તંત્ર હરકતમાં આવ્યું હતું.
આ કેસમાં મુખ્ય આરોપી રામ છૈયા ઉપરાંત તેનો ભાઈ શ્યામ છૈયા, પિતા મુકેશ છૈયા અને ભાજપના કાર્યકર રાજા ઉર્ફે રાજેશ ચાવડા સામે ગુનો નોંધવામાં આવ્યો છે. પોલીસે તમામ આરોપીઓ વિરુદ્ધ કાયદેસરની કાર્યવાહી શરૂ કરી છે અને ઘટનાની વધુ તપાસ હાથ ધરી છે.
આ ગંભીર ઘટનાને લઈને સ્થાનિક લોકોમાં પણ ભારે રોષ જોવા મળી રહ્યો છે. પોલીસ દ્વારા આરોપીઓની ભૂમિકા, ખંડણીની માંગણી અને અન્ય સંડોવણીના મુદ્દાઓની ઊંડાણપૂર્વક તપાસ કરવામાં આવી રહી છે.
