અમદાવાદ: શહેરના શાસ્ત્રીનગર વિસ્તારમાં શુક્રવારે એક ગંભીર માર્ગ અકસ્માત સર્જાયો હતો. DPS સ્કૂલ બસની પાછળ મોપેડ ઘૂસી જતાં મોપેડ ચાલકનું ઘટનાસ્થળે જ મોત નીપજ્યું હતું. અકસ્માત બાદ બસનો ડ્રાઇવર અને કંડક્ટર બસમાં બેઠેલા બાળકોને મૂકીને સ્થળ પરથી ફરાર થઈ જતા ભારે ચકચાર મચી હતી.
પ્રાપ્ત માહિતી મુજબ, શાસ્ત્રીનગર નજીક DPS સ્કૂલ બસ પસાર થઈ રહી હતી ત્યારે પાછળથી આવી રહેલી મોપેડ બસ સાથે અથડાઈ હતી. અકસ્માત એટલો ગંભીર હતો કે મોપેડ ચાલકને ગંભીર ઈજાઓ પહોંચતાં તેનું ઘટનાસ્થળે જ મોત થયું હતું.
અકસ્માતની જાણ થતાં આસપાસના લોકો મોટી સંખ્યામાં ઘટનાસ્થળે દોડી આવ્યા હતા. ઘટનાને પગલે થોડા સમય માટે વિસ્તારમાં અફરાતફરીનો માહોલ સર્જાયો હતો.
આરોપ છે કે અકસ્માત બાદ બસનો ડ્રાઇવર અને કંડક્ટર બસમાં રહેલા બાળકોને સ્થળ પર જ મૂકીને ફરાર થઈ ગયા હતા. ઘટનાની જાણ થતાં પોલીસ તાત્કાલિક સ્થળ પર પહોંચી હતી અને બાળકોની સુરક્ષાની વ્યવસ્થા કરી હતી.
પોલીસે મૃતદેહને પોસ્ટમોર્ટમ માટે ખસેડી અકસ્માતનો ગુનો નોંધી તપાસ શરૂ કરી છે. ફરાર ડ્રાઇવર અને કંડક્ટરની શોધખોળ હાથ ધરવામાં આવી છે. અકસ્માત કેવી રીતે સર્જાયો તે અંગે પોલીસે આસપાસના CCTV ફૂટેજ અને અન્ય પુરાવાઓના આધારે વધુ તપાસ શરૂ કરી છે.
