ટ્રાન્સપોર્ટ વેપારીને અપહરણ કરી જાનથી મારી નાખવાની ધમકી હેઠળ વસૂલાઈ કરોડોની ખંડણી; 3 આરોપી હજુ પોલીસ પકડથી દૂર
ગાંધીધામ: કચ્છના ગાંધીધામમાં ટ્રાન્સપોર્ટ વેપારીના અપહરણ અને ખંડણીના હાઈ-પ્રોફાઇલ કેસમાં પોલીસે મોટું સફળ ઓપરેશન પાર પાડી 7 આરોપીઓની ધરપકડ કરી છે. વેપારીનું અપહરણ કરી જાનથી મારી નાખવાની ધમકી આપી કરોડોની ખંડણી વસૂલવામાં આવી હોવાનું તપાસમાં સામે આવ્યું છે.
પોલીસ તપાસ દરમિયાન જાણવા મળ્યું કે આરોપીઓએ વેપારી પાસેથી દુબઈ સ્થિત એકાઉન્ટમાં ₹5.55 કરોડના USDT (ક્રિપ્ટો કરન્સી) ટ્રાન્સફર કરાવ્યા હતા. આર્થિક વ્યવહારો અને ડિજિટલ ટ્રેલના આધારે સમગ્ર કાવતરાનો પર્દાફાશ થયો છે.
કેસ ઉકેલવામાં CCTV ફૂટેજ, ટેક્નિકલ સર્વેલન્સ અને ડિજિટલ ઇન્ટેલિજન્સ મહત્વપૂર્ણ સાબિત થયા હતા. તેના આધારે પોલીસે અલગ-અલગ સ્થળોએ દરોડા પાડી સાત આરોપીઓને ઝડપી લીધા હતા.
પોલીસના જણાવ્યા મુજબ કેસમાં સંડોવાયેલા ત્રણ આરોપીઓ હજુ ફરાર છે. તેમની ધરપકડ માટે વિવિધ ટીમો સક્રિય કરવામાં આવી છે અને સમગ્ર ગુનાહિત નેટવર્ક સુધી પહોંચવા તપાસ વધુ તેજ કરવામાં આવી છે.
