રૂ.2.99 લાખથી શરૂ થશે કિંમત, 7.6 ઇંચનું ઇનર ડિસ્પ્લે; iPhone 18 Pro સિરીઝ સાથે Watch Series 12 અને AirPods 5 પણ લોન્ચ
નવી દિલ્હી: એપલે પોતાની ‘Surprise and Shine’ ઇવેન્ટમાં એકસાથે અનેક નવા પ્રોડક્ટ્સ રજૂ કરીને ટેક માર્કેટમાં ચર્ચા જગાવી છે. કંપનીએ iPhone 18 Pro અને iPhone 18 Pro Max ઉપરાંત પોતાનો પ્રથમ ફોલ્ડેબલ iPhone iPhone Duo લોન્ચ કર્યો છે. આ ઉપરાંત Apple Watch Series 12, Watch Ultra 4 અને AirPods 5 પણ રજૂ કરવામાં આવ્યા છે.
પુસ્તકની જેમ ખુલશે iPhone Duo
એપલનો પ્રથમ ફોલ્ડેબલ iPhone Duo પુસ્તકની જેમ ખુલતી ડિઝાઇન સાથે આવે છે. ફોન બંધ હોય ત્યારે બહારની તરફ 5.4 ઇંચનું ડિસ્પ્લે મળે છે, જ્યારે ફોન ખોલતાં 7.6 ઇંચનું ઇનર ડિસ્પ્લે ઉપલબ્ધ થાય છે.
બંને ડિસ્પ્લેમાં ProMotion અને Always-On Displayની સુવિધા આપવામાં આવી છે. ઇનર સ્ક્રીન પર નેનો-ટેક્સચર ફિનિશ આપવામાં આવી છે, જે ગ્લેર ઘટાડવાની સાથે ફોલ્ડિંગ બાદ દેખાતી ક્રીઝને પણ ઓછી દેખાય તેવી બનાવે છે. કંપનીના જણાવ્યા મુજબ આ અત્યાર સુધીનો સૌથી પાતળો iPhone છે.
A20 Pro ચિપ અને 48MP કેમેરા
iPhone Duoમાં A20 Pro ચિપ આપવામાં આવી છે. ડિવાઇસમાં કસ્ટમ વેપર ચેમ્બર તથા ડ્યુઅલ-બેટરી આર્કિટેક્ચર આધારિત થર્મલ મેનેજમેન્ટ સિસ્ટમ આપવામાં આવી છે.
ફોટોગ્રાફી માટે ફોનમાં 48MP Fusion Ultra Wide અને 48MP Fusion Main કેમેરા આપવામાં આવ્યા છે. આ ઉપરાંત તેમાં Apple Pencil સપોર્ટ પણ આપવામાં આવ્યો છે.
બેઝ મોડલની કિંમત રૂ.2.99 લાખ
iPhone Duoના 256GB સ્ટોરેજવાળા બેઝ મોડલની કિંમત રૂ.2,99,900 રાખવામાં આવી છે. જ્યારે 2TB સ્ટોરેજવાળા ટોપ મોડલની કિંમત રૂ.4,49,900 છે. ફોનનું પ્રી-ઓર્ડર બુકિંગ 16 ઓક્ટોબરથી શરૂ થશે.
iPhone 18 Pro સિરીઝની પણ એન્ટ્રી
એપલે સાથે જ iPhone 18 Pro અને iPhone 18 Pro Max પણ રજૂ કર્યા છે. iPhone 18 Proના 256GB મોડલની કિંમત રૂ.1,64,900, જ્યારે iPhone 18 Pro Maxના 256GB મોડલની કિંમત રૂ.1,79,900 રાખવામાં આવી છે.
બંને મોડલ માટે 12 સપ્ટેમ્બરથી પ્રી-ઓર્ડર શરૂ થશે અને 18 સપ્ટેમ્બરથી વેચાણ શરૂ થવાની માહિતી આપવામાં આવી છે.
AIથી એડિટ થયેલા ફોટા ઓળખવામાં પણ મદદ
એપલે ફોટોની વિશ્વસનીયતા અંગે પણ નવા ફીચર્સ રજૂ કર્યા છે. આ ફીચર્સની મદદથી રેફરન્સ ઈમેજ તથા AIથી બનાવવામાં આવેલી અથવા એડિટ કરવામાં આવેલી તસવીરોને ઓળખવામાં મદદ મળી શકે છે.
જૂના iPhone પણ હવે મોંઘા
નવા મોડલ્સના લોન્ચિંગ સાથે એપલે કેટલાક જૂના iPhoneની કિંમતોમાં પણ વધારો કર્યો છે. iPhone 17ના 256GB મોડલની કિંમત રૂ.82,000થી વધારીને રૂ.99,900 કરવામાં આવી છે. 512GB મોડલ હવે રૂ.1,24,900માં મળશે, જે અગાઉ રૂ.1,02,900 હતું.
iPhone 17eના 256GB મોડલની કિંમત રૂ.64,900થી વધીને રૂ.79,900, જ્યારે 512GB મોડલની કિંમત રૂ.84,900થી વધીને રૂ.1,04,900 થઈ છે. બીજી તરફ, iPhone 16ના 128GB મોડલની કિંમત રૂ.69,900થી વધીને રૂ.89,900 કરવામાં આવી છે.
આ લોન્ચિંગ સાથે એપલે ફોલ્ડેબલ સેગમેન્ટમાં પ્રથમ વખત એન્ટ્રી કરવાની સાથે iPhone 18 Pro સિરીઝ અને નવા Apple Watch તથા AirPods પણ બજારમાં ઉતાર્યા છે.
