તહેવારો પહેલાં જ ઈંધણના ભાવ વધવાની ચિંતા; ઘરેલુ LPGમાં પણ સિલિન્ડર દીઠ રૂ.200ની ખોટ
નવી દિલ્હી: આંતરરાષ્ટ્રીય બજારમાં ક્રૂડ ઓઈલના ભાવમાં ફરી તેજી આવતા ભારતમાં પેટ્રોલ-ડીઝલના ભાવ વધારાની આશંકા ઊભી થઈ છે. ક્રૂડ ઓઈલનો ભાવ 100 ડોલર પ્રતિ બેરલને પાર પહોંચતા ઓઈલ માર્કેટિંગ કંપનીઓ પર ખર્ચનું દબાણ વધી રહ્યું છે. જો ભાવ ઊંચા સ્તરે જળવાઈ રહેશે તો આગામી સમયમાં તેની અસર સ્થાનિક ઈંધણના ભાવ પર જોવા મળી શકે છે.
પેટ્રોલ-ડીઝલના વેચાણમાં ખોટ
સપ્ટેમ્બર મહિનાના સરેરાશ આંતરરાષ્ટ્રીય ક્રૂડ ભાવના આધારે પેટ્રોલના વેચાણમાં કંપનીઓને લગભગ રૂ.5 પ્રતિ લીટર, જ્યારે ડીઝલમાં લગભગ રૂ.23 પ્રતિ લીટર અન્ડર-રિકવરી થઈ રહી હોવાનું જણાવાયું છે. તહેવારોની સિઝનમાં આ સ્થિતિ સામાન્ય ગ્રાહકો માટે ચિંતાજનક બની શકે છે.
LPG સિલિન્ડર પર પણ રૂ.200ની અન્ડર-રિકવરી
ઈંધણની સાથે ઘરેલુ ગેસ પર પણ કંપનીઓ પર દબાણ વધ્યું છે. 14.5 કિલોના ઘરેલુ LPG સિલિન્ડર દીઠ આશરે રૂ.200ની અન્ડર-રિકવરી ચાલી રહી છે. આંતરરાષ્ટ્રીય નિષ્ણાતોના મતે નવેમ્બર અંત સુધી ક્રૂડ ઓઈલના ભાવમાં મોટો ઘટાડો થવાની શક્યતા ઓછી છે.
આયાત બિલમાં 56.5%નો વધારો
ક્રૂડ ઓઈલના વધેલા ભાવની અસર ભારતના આયાત ખર્ચ પર પણ પડી છે. એપ્રિલથી જુલાઈ દરમિયાન દેશનું ક્રૂડ ઓઈલ આયાત બિલ 56.5 ટકા વધીને 63.4 બિલિયન ડોલર સુધી પહોંચી ગયું છે.
ભારત પોતાની કુલ ક્રૂડ ઓઈલ જરૂરિયાતના આશરે 90 ટકા માટે આયાત પર નિર્ભર છે. જ્યારે ગેસની જરૂરિયાતનો આશરે 50 ટકા હિસ્સો વિદેશમાંથી આયાત કરવામાં આવે છે.
સપ્લાય ચેઈન પણ બની ચિંતાનો વિષય
ઊંચા ક્રૂડ ભાવ વચ્ચે વૈશ્વિક સપ્લાય ચેઈનની સ્થિતિ પણ અનિશ્ચિત છે. સપ્લાય વ્યવસ્થા સંપૂર્ણપણે સામાન્ય થવામાં સમય લાગી શકે છે. જો ક્રૂડના ભાવ લાંબા સમય સુધી ઊંચા રહે તો ઓઈલ કંપનીઓની અન્ડર-રિકવરી વધી શકે છે અને ભારતમાં પેટ્રોલ-ડીઝલ તથા LPGના ભાવ અંગે દબાણ વધુ ઘેરું બની શકે છે.
