આણંદ: પાળજ ગામના ચર્ચાસ્પદ જમીન કૌભાંડ કેસમાં રાજ્ય પોલીસ વિભાગે મહત્વપૂર્ણ કાર્યવાહી કરતાં આણંદ એલસીબીના ઇન્ચાર્જ પીઆઈ બી. એમ. માળીને સસ્પેન્ડ કરવામાં આવ્યા છે. આ કાર્યવાહી બાદ સમગ્ર પોલીસ તંત્રમાં ચર્ચાનો માહોલ સર્જાયો છે.
ઉલ્લેખનીય છે કે પાળજ ગામની જમીન કૌભાંડ મામલે નોંધાયેલા ગુનામાં ફરિયાદી તરીકે પીઆઈ બી. એમ. માળીનું નામ જોડાયેલું હતું. જોકે, હવે એ જ કેસના અનુસંધાનમાં તેમની સામે વિભાગીય કાર્યવાહી કરવામાં આવી છે અને તેમને સસ્પેન્ડ કરવાનો નિર્ણય લેવાયો છે.
સૂત્રોના જણાવ્યા મુજબ, કેસની તપાસ દરમિયાન સામે આવેલી વિગતો અને વિભાગીય સમીક્ષા બાદ આ નિર્ણય લેવામાં આવ્યો છે. સમગ્ર પ્રકરણમાં અન્ય કોઈ અધિકારી અથવા વ્યક્તિની સંડોવણી છે કે કેમ તે દિશામાં પણ તપાસ ચાલી રહી છે.
પોલીસ વિભાગે આ મામલે વધુ તપાસ શરૂ કરી છે. તપાસ પૂર્ણ થયા બાદ કેસમાં વધુ કાર્યવાહી કરવામાં આવશે તેવી માહિતી અધિકૃત સૂત્રોએ આપી છે.
