ભારતીય ક્રિકેટમાં રોહિત શર્માને લઈને ફરી એકવાર હલચલ તેજ બની છે. ટીમ ઈન્ડિયાના ચીફ સિલેક્ટર અજિત અગરકરનો સત્તાવાર કાર્યકાળ સપ્ટેમ્બરમાં પૂર્ણ થવાનો છે અને હવે તેમના કોન્ટ્રાક્ટને એક્સટેન્શન મળશે કે નહીં તેના પર સસ્પેન્સ યથાવત છે. BCCI અગરકરને આગળ પણ જવાબદારી સોંપવા માગે છે, પરંતુ અગરકર તરફથી હજુ સુધી કોઈ સકારાત્મક સંકેત મળ્યા હોવાનું કહેવાતું નથી.
આગામી 48 કલાકમાં નિર્ણયની શક્યતા
BCCIની અંદર અગરકરના કોન્ટ્રાક્ટને લઈને ચર્ચા ચાલી રહી છે. આગામી 48 કલાકમાં તેમના ભવિષ્ય અંગે મહત્વનો નિર્ણય લેવાઈ શકે છે. આગામી વર્ષે 50 ઓવરના વર્લ્ડ કપનું આયોજન ત્રણ દેશોમાં થવાનું હોવાથી પસંદગી સમિતિમાં સતતતા જળવાઈ રહે તે BCCI માટે મહત્વપૂર્ણ માનવામાં આવે છે.
નવા ચીફ સિલેક્ટરની નિમણૂક થાય તો તેમને કેપ્ટન, મુખ્ય કોચ, ખેલાડીઓ અને BCCI સાથે નવી રીતે તાલમેલ બેસાડવો પડશે. આવી સ્થિતિમાં BCCI અગરકરને જ ચાલુ રાખવા ઈચ્છે છે તેવી ચર્ચા છે.
રોહિત શર્માને લઈને મતભેદની ચર્ચા
અગરકર અને BCCI વચ્ચેના મતભેદ પાછળ રોહિત શર્માનો મુદ્દો પણ કારણભૂત હોવાનું ક્રિકેટ વર્તુળોમાં ચર્ચાઈ રહ્યું છે. દાવો છે કે પસંદગી સમિતિ અને મુખ્ય કોચ ગૌતમ ગંભીરની ટીમની ભવિષ્યની યોજનામાં રોહિતને આગામી વર્લ્ડ કપ માટે સ્થાન આપવાની સંભાવના ઓછી છે.
બાકીની વનડે મેચોમાં પણ ટીમ મેનેજમેન્ટ યુવા ઓપનરને તક આપવા માગે છે તેવી ચર્ચા છે. આ મામલે રોહિતે BCCIના કેટલાક અધિકારીઓ સાથે વાતચીત કરી હોવાનું પણ કહેવાય છે.
BCCI સેક્રેટરીએ રોહિતનું કર્યું સમર્થન
બીજી તરફ BCCIના સેક્રેટરીએ જાહેરમાં રોહિત શર્માનું સમર્થન કર્યું છે. તેમણે કહ્યું હતું કે રોહિત સારું પ્રદર્શન કરી રહ્યો છે અને જ્યાં સુધી તે સારું રમતો રહેશે ત્યાં સુધી તેના ભવિષ્ય અંગે ચિંતા કરવાની જરૂર નથી.
આ નિવેદન બાદ રોહિતને લઈને BCCIની અંદર એકસરખો અભિગમ છે કે નહીં તે અંગે પણ ચર્ચા શરૂ થઈ છે.
વર્લ્ડ કપ પ્લાનિંગ મીટિંગમાં અગરકરની ગેરહાજરીથી અટકળો
તાજેતરમાં યોજાયેલી ટીમ રિવ્યૂ અને આગામી વર્લ્ડ કપના આયોજન અંગેની બેઠકમાં અગરકર હાજર રહ્યા ન હોવાનું કહેવાય છે. તેઓ ઓનલાઈન પણ જોડાયા ન હતા. આ ઘટનાને પગલે તેમના અને ટીમ મેનેજમેન્ટ વચ્ચેના સંબંધો અંગે અટકળો વધુ તેજ બની છે.
મીડિયા રિપોર્ટ્સ, પૂર્વ ક્રિકેટરો અને ચાહકોમાં પણ એવી ચર્ચા છે કે અગરકર કદાચ ચીફ સિલેક્ટર તરીકે આગળ ચાલુ રહેવા ઈચ્છતા નથી. જોકે, તેમના ભવિષ્ય અંગે અંતિમ નિર્ણય BCCIની સત્તાવાર ચર્ચા બાદ જ સ્પષ્ટ થશે.
