ભારતીય સિનેમાની સૌથી મોંઘી ફિલ્મમાં બોલિવૂડ-સાઉથના દિગ્ગજોની જોડી; દિવાળી 2026માં પ્રથમ ભાગ રિલીઝ થશે
મુંબઈ: દિગ્દર્શક નિતેશ તિવારીના ડ્રીમ પ્રોજેક્ટ **‘રામાયણ’**ને લઈને દેશભરમાં ભારે ઉત્સાહ જોવા મળી રહ્યો છે. અંદાજે ₹4,000 કરોડના બજેટ સાથે બની રહેલી આ ફિલ્મ ભારતીય સિનેમાના ઇતિહાસની સૌથી મોંઘી ફિલ્મ બનવા જઈ રહી છે. ફિલ્મ બે ભાગમાં રિલીઝ થશે, જેમાં પ્રથમ ભાગ દિવાળી 2026 અને બીજો ભાગ દિવાળી 2027માં દર્શકો સમક્ષ આવશે.
ફિલ્મમાં રણબીર કપૂર ભગવાન શ્રીરામની ભૂમિકામાં જોવા મળશે, જેના માટે તેમને બંને ભાગ મળીને ₹150 કરોડ ફી ચૂકવાઈ છે. જ્યારે KGF ફેમ સાઉથ સુપરસ્ટાર યશ રાવણની ભૂમિકા સાથે કો-પ્રોડ્યુસર તરીકે પણ જોડાયા છે અને તેમને ₹100 કરોડ ફી મળી રહી છે.
સાઈ પલ્લવી માતા સીતાના પાત્રમાં બોલિવૂડમાં ડેબ્યૂ કરશે, જેના માટે તેમને ₹12 કરોડ આપવામાં આવ્યા છે. સની દેઓલ ભગવાન હનુમાનની ભૂમિકા માટે ₹40 કરોડ, જ્યારે રવિ દુબે લક્ષ્મણના પાત્ર માટે ₹10થી ₹20 કરોડ ફી મેળવી રહ્યા છે. વિવેક ઓબેરોયએ પોતાના પાત્ર માટે કોઈ ફી લીધા વગર પ્રોજેક્ટમાં યોગદાન આપ્યું છે.
ફિલ્મના સંગીતની જવાબદારી પ્રથમ વખત એ.આર. રહેમાન અને હોલિવૂડના ઓસ્કર વિજેતા સંગીતકાર હેન્સ ઝિમર સંભાળી રહ્યા છે. અહેવાલો મુજબ રહેમાનને આશરે ₹30 કરોડ ફી ઉપરાંત પ્રોફિટ શેર પણ મળશે. ફિલ્મનું શૂટિંગ પૂર્ણ થઈ ચૂક્યું છે અને હાલ પોસ્ટ-પ્રોડક્શનનું કામ અંતિમ તબક્કામાં ચાલી રહ્યું છે.
