RMC માટે કામગીરી કરતા કેટલાક વાહનોના કાગળો પૂર્ણ ન હોવાનો દાવો; સ્પષ્ટતા અને તપાસની માંગ
રાજકોટ: રાજકોટ મહાનગરપાલિકા (RMC) માટે કામગીરી કરતા કેટલાક વાહનોના દસ્તાવેજોને લઈને સવાલો ઊભા થયા છે. કેટલાક વાહનોના ઇન્સ્યોરન્સ, PUC, ફિટનેસ સર્ટિફિકેટ અને RC સહિતના જરૂરી દસ્તાવેજોમાં ગેરરીતિ હોવાના આક્ષેપ કરવામાં આવ્યા છે.
દાવા મુજબ, કેટલાક વાહનોના દસ્તાવેજોની મુદત પૂર્ણ થઈ ગઈ હોવા છતાં તેઓ કોર્પોરેશનની કામગીરીમાં ઉપયોગમાં લેવાઈ રહ્યા હોવાની ચર્ચા છે. જોકે, આ દાવાઓ અંગે હજુ સુધી સત્તાવાર પુષ્ટિ થઈ નથી.
આ સમગ્ર મામલે હવે સવાલ એ ઊભો થયો છે કે જાહેર જનતાને વાહન નિયમોનું પાલન કરાવતી સંસ્થાના પોતાના વાહનો તમામ નિયમોનું પાલન કરે છે કે નહીં?
આક્ષેપોને પગલે રાજકોટ મહાનગરપાલિકા તરફથી સત્તાવાર સ્પષ્ટતા તેમજ સમગ્ર મામલે નિષ્પક્ષ તપાસ કરવાની માંગ ઉઠી છે. હાલ આ મુદ્દે RMC દ્વારા કોઈ સત્તાવાર નિવેદન જાહેર કરવામાં આવ્યું નથી.
