સોમનાથ-2 વિસ્તારમાં જીવલેણ હુમલો, બે અન્ય ઈજાગ્રસ્ત; વળતા હુમલામાં આરોપી હાર્દિક ધોળકિયા પણ ઘાયલ
રાજકોટ: શહેરના યુનિવર્સિટી રોડ નજીક આવેલા સોમનાથ-2 વિસ્તારમાં પૈસાની લેતીદેતીને લઈને થયેલો કૌટુંબિક વિવાદ લોહિયાળ બની ગયો હતો. ઉગ્ર બોલાચાલી બાદ ભત્રીજાએ પોતાના કાકા પર જીવલેણ હુમલો કરતાં તેમનું ઘટનાસ્થળે જ મોત નીપજ્યું હતું. હુમલામાં અન્ય બે લોકો પણ ગંભીર રીતે ઈજાગ્રસ્ત થયા હતા.
ઘટના દરમિયાન બંને પક્ષ વચ્ચે થયેલા વળતા હુમલામાં મુખ્ય આરોપી હાર્દિક ધોળકિયા પણ ઘાયલ થયો હતો. ઘટનાને પગલે સમગ્ર વિસ્તારમાં ભારે અફરાતફરી અને તણાવનો માહોલ સર્જાયો હતો.
સ્થાનિક લોકોની જાણ બાદ પોલીસ અને 108ની ટીમ તાત્કાલિક સ્થળ પર પહોંચી હતી. ઈજાગ્રસ્તોને તાત્કાલિક ખાનગી હોસ્પિટલમાં ખસેડવામાં આવ્યા હતા, જ્યાં તેમની સારવાર ચાલી રહી છે.
પ્રાથમિક તપાસમાં સામે આવ્યું છે કે પૈસાની લેતીદેતીના મુદ્દે બંને પક્ષ વચ્ચે લાંબા સમયથી વિવાદ ચાલી રહ્યો હતો. આ જ વિવાદે રવિવારે હિંસક સ્વરૂપ ધારણ કરતાં હત્યાની ઘટના બની હતી.
યુનિવર્સિટી પોલીસે ઘટનાસ્થળેથી જરૂરી પુરાવા એકત્ર કરી હત્યા સહિતની ગંભીર કલમો હેઠળ ગુનો નોંધી તપાસ શરૂ કરી છે. પોલીસ સમગ્ર ઘટનાક્રમ, હુમલાનું ચોક્કસ કારણ અને તેમાં અન્ય કોઈની સંડોવણી છે કે નહીં તે દિશામાં પણ તપાસ આગળ ધપાવી રહી છે.
