ટેલેન્ટ ફટાકડા ફેક્ટરીમાં અચાનક ભડકેલી આગથી અરેરાટી; બચાવ કામગીરી માટે તંત્રનો ધમધમાટ
અમદાવાદ: શહેરના વસ્ત્રાલ વિસ્તારમાં આવેલી ટેલેન્ટ ફટાકડા ફેક્ટરીમાં ભીષણ આગ લાગતાં મોટી જાનહાનિ સર્જાઈ છે. પ્રાથમિક અહેવાલો મુજબ આ દુર્ઘટનામાં 8 લોકોના મોત થયા છે, જ્યારે 10 લોકો ગંભીર રીતે ઇજાગ્રસ્ત થયા છે. તમામ ઘાયલોને તાત્કાલિક હોસ્પિટલમાં ખસેડી સારવાર આપવામાં આવી રહી છે.
આગ એટલી વિકરાળ હતી કે થોડા જ સમયમાં સમગ્ર ફેક્ટરી તેની ઝપેટમાં આવી ગઈ હતી. ઘટનાને પગલે વિસ્તારમાં અફરાતફરીનો માહોલ સર્જાયો હતો અને આસપાસના લોકોમાં ભય ફેલાઈ ગયો હતો.
ઘટનાની જાણ થતાં ફાયર બ્રિગેડની અનેક ગાડીઓ, પોલીસ અને 108 ઇમરજન્સી સેવાની ટીમો તાત્કાલિક સ્થળે પહોંચી હતી. આગ પર કાબૂ મેળવવા તેમજ ફેક્ટરીમાં ફસાયેલા લોકોને બહાર કાઢવા માટે યુદ્ધના ધોરણે બચાવ કામગીરી હાથ ધરવામાં આવી રહી છે.
ફાયર વિભાગ દ્વારા આગના કાબૂ માટે સતત પ્રયાસો ચાલુ છે. સાથે જ કાટમાળમાં અન્ય કોઈ ફસાયેલું છે કે નહીં તેની પણ સઘન તપાસ કરવામાં આવી રહી છે.
હાલ આગ લાગવાનું ચોક્કસ કારણ સામે આવ્યું નથી. ફાયર વિભાગ અને સંબંધિત તપાસ એજન્સીઓ સમગ્ર ઘટનાની તપાસ કરી રહી છે. આ દુર્ઘટનાએ સમગ્ર શહેરને શોકમાં ગરકાવ કરી દીધું છે.
