રાજકોટના વોર્ડ નં. 9માં બાંધકામ મુદ્દે વિવાદ; સ્થાનિકોમાં અનેક સવાલો, કોર્પોરેશનની કાર્યવાહી પર નજર
રાજકોટ: શહેરના વોર્ડ નં. 9 વિસ્તારમાં આવેલા ગંગોત્રી પાર્ક મેઈન રોડ પર ચાલી રહેલા એક બાંધકામને લઈને વિવાદ ઊભો થયો છે. સ્થાનિક ભાજપ આગેવાન દ્વારા ગેરકાયદે બાંધકામ અંગે ફરિયાદ કરવામાં આવ્યા બાદ બાંધકામના ભાગને લીલા રંગના કવરથી ઢાંકી દેવામાં આવ્યું હોવાનું સામે આવ્યું છે.
આ ઘટનાને પગલે સ્થાનિકોમાં વિવિધ ચર્ચાઓ શરૂ થઈ છે. કેટલાક લોકોનો આક્ષેપ છે કે ફરિયાદ છતાં બાંધકામ સામે તાત્કાલિક કાર્યવાહી કરવામાં આવી નથી, જેના કારણે રાજકોટ મહાનગરપાલિકાના ટાઉન પ્લાનિંગ વિભાગની કામગીરી અંગે પણ પ્રશ્નો ઉઠી રહ્યા છે.
ઉલ્લેખનીય છે કે વોર્ડ નં. 9 ભાજપનો મજબૂત વિસ્તાર માનવામાં આવે છે. ફરિયાદ ભાજપના આગેવાન દ્વારા કરવામાં આવી હોવા છતાં બાંધકામ યથાવત રહેતાં સ્થાનિક કાર્યકરોમાં પણ ચર્ચાનો માહોલ સર્જાયો હોવાનું જાણવા મળી રહ્યું છે.
જો કે, બાંધકામ ખરેખર ગેરકાયદેસર છે કે નહીં અને તેના સંબંધમાં રાજકોટ મહાનગરપાલિકા દ્વારા શું કાર્યવાહી કરવામાં આવશે તે અંગે સત્તાવાર સ્પષ્ટતા હજુ સુધી સામે આવી નથી. સમગ્ર મામલે હવે કોર્પોરેશનના આગામી પગલાં પર સૌની નજર છે.
