જૂનાગઢ: વિશ્વવિખ્યાત ગિરનાર યાત્રાધામ ખાતે વહેલી સવારે દુઃખદ ઘટના બની હતી. ખેડા જિલ્લાના મહેમદાવાદ તાલુકાના મોડજ ગામથી પરિવાર સાથે દર્શનાર્થે આવેલા 11 વર્ષીય બાળક પર સિંહે હુમલો કરતાં તેનું મોત નિપજ્યું હતું. ઘટનાને પગલે યાત્રાળુઓમાં ભય અને શોકની લાગણી ફેલાઈ ગઈ હતી, જ્યારે વન વિભાગ અને પોલીસની ટીમો તાત્કાલિક ઘટનાસ્થળે પહોંચી તપાસમાં જોડાઈ હતી.
મળતી માહિતી મુજબ પરિવાર વહેલી સવારે ગિરનારના પગથિયાં ચડી રહ્યો હતો. ગેટથી અંદર થોડા જ પગથિયાં આગળ વધતા અચાનક સિંહે બાળક પર હુમલો કર્યો હતો. પરિવારજનો અને અન્ય યાત્રાળુઓએ તાત્કાલિક મદદ માટે પ્રયાસો કર્યા, પરંતુ બાળકને બચાવી શકાયું નહોતું.
બાળકના કાકા અનિલકુમારસિંહ ચૌહાણે જણાવ્યું કે, ગિરનારની સીડીઓ પર પૂરતી લાઇટ વ્યવસ્થા ન હોવાથી વહેલી સવારના અંધકારમાં જોખમની જાણ થવી મુશ્કેલ બને છે. તેમણે સમગ્ર માર્ગ પર યોગ્ય લાઇટિંગ, નિયમિત પેટ્રોલિંગ અને સંવેદનશીલ સ્થળોએ વન વિભાગના કર્મચારીઓની તહેનાત કરવાની માંગ કરી હતી.
ઘટનાના પ્રત્યક્ષદર્શીઓના જણાવ્યા અનુસાર, છેલ્લા કેટલાક દિવસોથી ગિરનારની સીડીઓની આસપાસ સિંહોની અવરજવર જોવા મળી રહી હતી. સ્થાનિકોએ વન વિભાગને વધુ સતર્ક રહેવા અને યાત્રાળુઓની સુરક્ષા માટે કાયમી વ્યવસ્થા કરવાની માંગ ઉઠાવી છે.
બનાવની ગંભીરતાને ધ્યાનમાં રાખીને પોલીસે મુખ્ય સીડી વિસ્તારને તાત્કાલિક બંધ કરી દીધો છે અને યાત્રાળુઓને વૈકલ્પિક માર્ગથી અવરજવર કરવા સૂચના આપવામાં આવી છે. બીજી તરફ વન વિભાગે અલગ-અલગ ટીમો બનાવી સિંહની શોધખોળ શરૂ કરી છે તેમજ જરૂરી સુરક્ષા પગલાં પણ અમલમાં મૂક્યા છે.
આ ઘટનાએ ગિરનાર યાત્રાધામની સુરક્ષા વ્યવસ્થા અંગે અનેક પ્રશ્નો ઊભા કર્યા છે. સ્થાનિકો અને યાત્રાળુઓએ ભવિષ્યમાં આવી દુર્ઘટનાઓ અટકાવવા માટે લાઇટિંગ, સતત પેટ્રોલિંગ અને વન્યજીવોની હિલચાલ પર વધુ અસરકારક નજર રાખવાની માંગ કરી છે.
