₹2.48 કરોડની લૂંટના કેસમાં અત્યાર સુધી કુલ 7 આરોપીઓની ધરપકડ; ફરાર 6 આરોપીઓને ઝડપી પાડવા તપાસ તેજ
રાજકોટ: શાપર વિસ્તારમાં થયેલી ₹2.48 કરોડની ધાડના ચર્ચિત કેસમાં રાજકોટ પોલીસને વધુ એક મહત્વની સફળતા મળી છે. પોલીસે વધુ ચાર આરોપીઓની ધરપકડ કરી તેમની પાસેથી ₹12.50 લાખની રોકડ સહિત મહત્વનો મુદ્દામાલ કબજે કર્યો છે.
પોલીસના જણાવ્યા મુજબ, આ કાર્યવાહી બાદ અત્યાર સુધી કેસમાં કુલ 7 આરોપીઓની ધરપકડ કરવામાં આવી છે. તેમની પાસેથી મળીને ₹45.50 લાખની રોકડ સહિતનો મુદ્દામાલ જપ્ત કરવામાં આવ્યો છે.
તપાસ દરમિયાન પોલીસને લૂંટની રકમના વ્યવહાર અને આરોપીઓના નેટવર્ક અંગે મહત્વની માહિતી પણ મળી હોવાનું જાણવા મળ્યું છે. આ માહિતીના આધારે કેસમાં સંડોવાયેલા અન્ય આરોપીઓ સુધી પહોંચવા માટે તપાસનો વ્યાપ વધારવામાં આવ્યો છે.
પોલીસના જણાવ્યા અનુસાર, આ કેસમાં હજુ 6 આરોપીઓ ફરાર છે, જેમની શોધખોળ માટે અલગ-અલગ ટીમો કાર્યરત કરવામાં આવી છે. સંભવિત ઠેકાણાઓ પર દરોડા પાડવા ઉપરાંત ટેક્નિકલ સર્વેલન્સ અને અન્ય આધુનિક તપાસ પદ્ધતિઓનો પણ ઉપયોગ કરવામાં આવી રહ્યો છે.
રાજકોટ પોલીસનું કહેવું છે કે બાકીના તમામ આરોપીઓને પણ ટૂંક સમયમાં ઝડપી લેવામાં આવશે અને સમગ્ર લૂંટકાંડનો ભેદ સંપૂર્ણપણે ઉકેલી લેવામાં આવશે.
