ફેક્ટરી ચાલુ રાખવા અને હેરાનગતિ ન કરવા ₹50 હજારની લાંચની માંગણીનો આક્ષેપ; જાહેર રોડ પર રૂપિયા લેવા બોલાવ્યા બાદ ACB ટ્રેપની ગંધ આવતાં સ્થળ પરથી ભાગી છૂટ્યો
ભુજ: કચ્છ જિલ્લાના વાયોર પોલીસ મથકમાં ફરજ બજાવતા એક PSI સામે લાંચ માંગવાના ગંભીર આક્ષેપોને પગલે ભ્રષ્ટાચાર વિરોધી બ્યુરો (ACB)એ ગુનો નોંધ્યો છે. ફરિયાદ મુજબ, ફેક્ટરીનું કામકાજ ચાલુ રાખવા અને પોલીસ તરફથી કોઈ હેરાનગતિ ન થાય તે બદલ PSIએ ₹50 હજારની લાંચની માંગણી કરી હતી.
ફરિયાદના આધારે ACBએ ટ્રેપ ગોઠવ્યો હતો. નક્કી થયેલી યોજના મુજબ ફરિયાદીને ભુજના ગાયત્રી મંદિર નજીક આવેલા જાહેર રોડ પર રૂપિયા લઈને આવવા જણાવાયું હતું. જોકે, ટ્રેપ દરમિયાન PSIને ACBની કાર્યવાહીનો સંકેત મળી જતાં તેણે રૂપિયા લઈને સ્થળ પરથી ફરાર થઈ જવાનો પ્રયાસ કર્યો હતો.
ACBની તપાસ દરમિયાન PSI દ્વારા ₹40 હજારની લાંચ સ્વીકારવાના પુરાવાના આધારે તેની સામે ભ્રષ્ટાચાર નિવારણ અધિનિયમ હેઠળ ગુનો નોંધવામાં આવ્યો છે. આરોપી પોલીસ અધિકારીની શોધખોળ શરૂ કરવામાં આવી છે અને સમગ્ર ઘટનાક્રમ અંગે વધુ તપાસ હાથ ધરવામાં આવી રહી છે.
ACBના અધિકારીઓએ જણાવ્યું છે કે કેસમાં તમામ પુરાવા એકત્ર કરવાની કાર્યવાહી ચાલુ છે અને કાયદેસરની પ્રક્રિયા મુજબ આરોપી સામે કડક પગલાં લેવામાં આવશે.
