વૈશ્વિક બજારમાં નરમાઈની અસર સ્થાનિક બજારમાં પણ જોવા મળી; ડોલર મજબૂત બનતાં કિંમતી ધાતુઓ પર દબાણ
રાજકોટ: સોના-ચાંદીના ભાવમાં ગત સપ્તાહ દરમિયાન જોવા મળેલી તેજી લાંબી ટકી શકી નથી. વૈશ્વિક બજારમાં નરમાઈના કારણે કિંમતી ધાતુઓના ભાવમાં સતત ઘટાડો નોંધાઈ રહ્યો છે. આજે પણ સ્થાનિક બજારમાં સોનું અને ચાંદી બંનેના ભાવમાં નોંધપાત્ર ઘટાડો જોવા મળ્યો હતો.
રાજકોટ બજારમાં 10 ગ્રામ હાજર સોનાનો ભાવ ₹500 ઘટીને ₹1,50,100 પર પહોંચ્યો હતો. વૈશ્વિક બજારમાં સોનાનો ભાવ પ્રતિ ઔંસ 4,147 ડોલર રહ્યો હતો. બીજી તરફ કોમોડિટી એક્સચેન્જમાં સોનાના વાયદા ભાવમાં ₹575નો ઘટાડો નોંધાતાં ભાવ ₹1,46,800 રહ્યા હતા.
ચાંદીના ભાવમાં પણ ઘટાડો યથાવત રહ્યો હતો. હાજર ચાંદીનો ભાવ ₹700 ઘટીને પ્રતિ કિલો ₹2.40 લાખ થયો હતો, જ્યારે કોમોડિટી એક્સચેન્જમાં ચાંદીના વાયદા ભાવ ₹1,050ના ઘટાડા સાથે ₹2,36,365 રહ્યા હતા.
બજારના વેપારીઓના જણાવ્યા મુજબ, વૈશ્વિક આર્થિક પરિબળો અને અમેરિકન ડોલરની મજબૂતીના કારણે કિંમતી ધાતુઓના ભાવ પર દબાણ જોવા મળી રહ્યું છે. કરન્સી માર્કેટમાં પણ આજે ડોલર સામે રૂપિયો ફરી નબળો પડ્યો હતો. વેપારીઓનું માનવું છે કે જો રૂપિયો મજબૂત રહ્યો હોત તો સોના-ચાંદીમાં ઘટાડો વધુ તીવ્ર બની શક્યો હોત.
હાલ બજારમાં ખરીદીની માંગ પણ મર્યાદિત હોવાથી ભાવમાં નરમાઈ જોવા મળી રહી છે. આગામી તહેવારોની સિઝનમાં માંગ વધે છે કે નહીં તેના આધારે બજારનો આગામી ટ્રેન્ડ નક્કી થશે.
બીજી તરફ આંતરરાષ્ટ્રીય બજારમાં ક્રૂડ ઓઇલના ભાવમાં પણ સતત ઘટાડો નોંધાયો છે. બ્રેન્ટ ક્રૂડનો ભાવ પ્રતિ બેરલ 72 ડોલરની નીચે સરકીને 71.71 ડોલરે પહોંચ્યો હતો, જ્યારે WTI ક્રૂડ 68.36 ડોલર પ્રતિ બેરલ પર ટ્રેડ થતું હતું.
