સુરત ACB પોલીસે 8 વર્ષ જૂના લાંચ કેસમાં એક હોમગાર્ડની ધરપકડ કરી છે. ગાંધીનગર ફોરેન્સિક સાયન્સ લેબોરેટરી (FSL)માં કરાયેલા વોઈસ સ્પેક્ટ્રોગ્રાફી ટેસ્ટમાં અવાજ મેચ થતાં આરોપી સામે કાયદેસરની કાર્યવાહી હાથ ધરવામાં આવી હતી.
મળતી માહિતી મુજબ, વર્ષ 2018માં એક મહિલા વિરુદ્ધ દારૂ સંબંધિત ગુનો નોંધાયો હતો. આ કેસ દરમિયાન લાંચની માંગણી કરવામાં આવી હોવાની ફરિયાદના આધારે તપાસ શરૂ કરવામાં આવી હતી.
તપાસ દરમિયાન આરોપીના અવાજના નમૂનાઓ ગાંધીનગર FSLમાં વોઈસ સ્પેક્ટ્રોગ્રાફી પરીક્ષણ માટે મોકલવામાં આવ્યા હતા. પરીક્ષણમાં હોમગાર્ડનો અવાજ રેકોર્ડ થયેલા અવાજ સાથે મેચ થતાં તપાસને મહત્વપૂર્ણ દિશા મળી હતી.
વૈજ્ઞાનિક પુરાવાના આધારે સુરત ACB પોલીસે આરોપી વિરુદ્ધ ગુનો નોંધી તેની ધરપકડ કરી છે. લાંબા સમયથી ચાલી રહેલી તપાસ બાદ મળેલા પુરાવાઓને આધારે આ કાર્યવાહી કરવામાં આવી હોવાનું જાણવા મળ્યું છે.
હાલ ACB દ્વારા આરોપીની વધુ પૂછપરછ કરવામાં આવી રહી છે અને સમગ્ર મામલે અન્ય કોઈ વ્યક્તિની સંડોવણી છે કે નહીં તે દિશામાં પણ તપાસ આગળ વધારવામાં આવી રહી છે.
