સમય ભલે બદલાય, પણ ૧૨ જૂનનો એ દિવસ ગુજરાત ક્યારેય નહીં ભૂલી શકે. રોજની જેમ એ પણ એક સામાન્ય, આશાભરી બપોર હતી. ‘એર ઇન્ડિયા’ની એ ફ્લાઇટ લંડન જવા માટે તૈયાર હતી, જેમાં સેંકડો મુસાફરો પોતાના સપનાઓ, નવી આશાઓ અને વ્હાલસોયા પરિવારોને ગળે લગાવીને સવાર થયા હતા. આ મુસાફરોમાં ગુજરાતના પૂર્વ મુખ્યમંત્રી વિજયભાઈ રૂપાણી પણ હતા. કોઈને અંદાજ નહોતો કે આ સફર જિંદગીની આખરી સફર બની જશે. હજુ તો વિમાને આકાશ આંબ્યું જ હતું, ત્યાં જ સમયે કાળમુખો વળાંક લીધો. ટેકનિકલ ખામી, હવામાં હિલોળા ખાતું વિમાન અને પાયલોટોની લાચારી… ગણતરીની સેકન્ડોમાં જ એક પ્રચંડ ધડાકા સાથે બધું જ શાંત થઈ ગયું. મુસાફરોની ચીસાચીસ અને સપનાઓ પળભરમાં રાખ થઈ ગયા. આજે આ હૃદયદ્રાવક ઘટનાને એક વર્ષ પૂરું થયું છે. એરપોર્ટ પર ફ્લાઇટ્સ આજે પણ સામાન્ય રીતે ઉડે છે, પણ જેમના વ્હાલસોયા આ અકસ્માતમાં હોમાઈ ગયા, તેમની જિંદગીમાં કાયમી અંધકાર છવાઈ ગયો છે. આ કાળમુખી બપોરે ગુમાવેલા તમામ દિવંગત આત્માઓને ભાવભીની શ્રદ્ધાંજલિ.
