નવ વર્ષમાં કરદાતાઓની સંખ્યા 5.08 લાખથી વધીને 14.31 લાખે પહોંચી; રાજ્યની કુલ કર આવક ₹11,873 કરોડ
ગાંધીનગર: ગુજરાતમાં ગુડ્સ એન્ડ સર્વિસ ટેક્સ (GST) હેઠળ આવકમાં સતત વધારો નોંધાઈ રહ્યો છે. જૂન-2026 દરમિયાન રાજ્યને GSTમાંથી ₹7,800 કરોડની આવક થઈ છે, જે ગયા વર્ષના સમાન સમયગાળાની સરખામણીએ 28 ટકા વધુ છે. રાજ્ય કર વિભાગના આંકડા મુજબ જૂન-2025માં GST હેઠળ ₹6,149 કરોડની આવક થઈ હતી.
દેશભરમાં 1 જુલાઈ, 2017થી અમલમાં આવેલા GST કાયદાએ **’વન નેશન, વન ટેક્સ’**નો સિદ્ધાંત અમલમાં મૂક્યો હતો. તેના પરિણામે સમગ્ર દેશમાં માલ અને સેવાઓ પર એકસરખો કર લાગુ થયો છે, જ્યારે આંતરરાજ્ય વેપાર અને ઇનપુટ ટેક્સ ક્રેડિટની પ્રક્રિયા વધુ સરળ બનતાં વેપારીઓને પણ રાહત મળી છે.
GST અમલી બન્યા બાદ માત્ર નવ વર્ષમાં ગુજરાતના ટેક્સ બેઝમાં 181 ટકાથી વધુનો વધારો નોંધાયો છે. વર્ષ 2017માં રાજ્યમાં 5.08 લાખ કરદાતાઓ હતા, જે વધીને હાલમાં 14.31 લાખ થયા છે.
રાજ્ય સરકારના જણાવ્યા અનુસાર GST વ્યવસ્થાના કારણે વેપારીઓ માટે ટેક્સ કોમ્પ્લાયન્સ સરળ બન્યું છે. ગુજરાત સતત પાંચમા વર્ષે GST રિટર્ન સમયસર ભરવામાં દેશભરમાં પ્રથમ ક્રમે રહ્યું છે. નાણાકીય વર્ષ 2025-26 દરમિયાન 99.6 ટકા GST રિટર્ન સમયમર્યાદામાં ભરાયા હોવાનું નોંધાયું છે.
રાજ્યની GST આવકમાં છેલ્લા પાંચ વર્ષ દરમિયાન સરેરાશ 20 ટકાથી વધુના વાર્ષિક વૃદ્ધિદર (CAGR) સાથે વધારો થયો છે. નાણાકીય વર્ષ 2020-21માં ₹30,628 કરોડ રહેલી આવક વધીને 2025-26માં ₹83,066 કરોડ થઈ છે.
જૂન-2026 દરમિયાન રાજ્યને GST હેઠળ ₹7,800 કરોડ, VAT હેઠળ ₹3,073 કરોડ, વીજ શુલ્ક હેઠળ ₹979 કરોડ અને વ્યવસાય વેરા હેઠળ ₹21 કરોડની આવક મળી હતી. આમ, રાજ્ય કર વિભાગને વિવિધ કરમાધ્યમો દ્વારા કુલ ₹11,873 કરોડની આવક પ્રાપ્ત થઈ છે.
GST અમલીકરણ દિવસની ઉજવણીના ભાગરૂપે રાજ્ય કર વિભાગે ગુજરાત કેન્સર રિસર્ચ ઇન્સ્ટિટ્યૂટ (GCRI), સિવિલ હોસ્પિટલ અમદાવાદના સહયોગથી રક્તદાન શિબિરનું આયોજન કર્યું હતું. આ શિબિરમાં 105થી વધુ રક્તદાતાઓએ સ્વૈચ્છિક રક્તદાન કરીને સામાજિક જવાબદારી નિભાવી હતી.
