ચોર્નોમોર્સ્ક બંદર નજીક ‘MV AMIR1’ પર 15 ક્રૂ સભ્યો અટવાયા; ભારત સરકારને તાત્કાલિક રેસ્ક્યૂ માટે અપીલ
નવી દિલ્હી: યુક્રેનના ચોર્નોમોર્સ્ક બંદર નજીક યુદ્ધગ્રસ્ત વિસ્તારમાં ઉભેલા ‘MV AMIR1’ કાર્ગો જહાજ પર 13 ભારતીય ખલાસીઓ સહિત કુલ 15 ક્રૂ સભ્યો ફસાઈ ગયા છે. આસપાસ સતત થઈ રહેલા ડ્રોન અને મિસાઈલ હુમલાઓને કારણે તમામ ખલાસીઓ જીવના જોખમ વચ્ચે દિવસો પસાર કરી રહ્યા હોવાનું સામે આવ્યું છે.
**ફોરવર્ડ સીમેન્સ યુનિયન ઓફ ઈન્ડિયા (FSUI)**ના જણાવ્યા મુજબ જહાજની આસપાસનું સમગ્ર ક્ષેત્ર સતત હુમલાની ઝપેટમાં હોવાથી ક્રૂ સભ્યો ભારે ભયના માહોલમાં છે. ગમે ત્યારે હુમલો જહાજને નિશાન બનાવી શકે તેવી સ્થિતિ વચ્ચે સુરક્ષિત રીતે બહાર કાઢવાની માંગ ઉઠી છે.
યુનિયને ભારત સરકાર, જહાજના માલિકો અને ફ્લેગ સ્ટેટને તાત્કાલિક હસ્તક્ષેપ કરવાની અપીલ કરી છે. તમામ ભારતીય ખલાસીઓને સુરક્ષિત સ્થળે ખસેડી વતન પરત લાવવા માટે ઝડપી કાર્યવાહી કરવાની માંગ કરવામાં આવી છે.
આ ઘટના એવા સમયે સામે આવી છે જ્યારે તાજેતરમાં જ બ્લેક સીમાં વ્યાપારી જહાજો પર થતા હુમલાઓને લઈને ભારતે ગંભીર ચિંતા વ્યક્ત કરી હતી. અગાઉ ‘MV OMORFI’ પર થયેલા હુમલામાં એક ભારતીય ખલાસીનું મોત થયા બાદ ભારતે યુક્રેન સમક્ષ કડક વિરોધ નોંધાવી વેપારી જહાજો અને નાગરિકોની સુરક્ષા સુનિશ્ચિત કરવાની માંગ કરી હતી.
યુદ્ધની વધતી તીવ્રતા વચ્ચે ફસાયેલા ભારતીય ખલાસીઓની સુરક્ષા હવે સૌથી મોટો મુદ્દો બન્યો છે અને તેમને સુરક્ષિત બહાર કાઢવા માટે સરકારના આગામી પગલાં પર સૌની નજર મંડાઈ છે.
