અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો છે કે ચીનના રાષ્ટ્રપતિ શી જિનપિંગ આગામી બે અઠવાડિયામાં અમેરિકાની મુલાકાતે આવશે. જોકે, ટ્રમ્પની જાહેરાત બાદ હજુ સુધી ચીન સરકાર કે વ્હાઇટ હાઉસ તરફથી મુલાકાતની ચોક્કસ તારીખ અને સત્તાવાર કાર્યક્રમ અંગે પુષ્ટિ કરવામાં આવી નથી.
ટ્રમ્પે સોમવારે વ્હાઇટ હાઉસના રોઝ ગાર્ડનમાં યોજાયેલા કાર્યક્રમમાં શી જિનપિંગની સંભવિત અમેરિકા મુલાકાતનો ઉલ્લેખ કર્યો હતો. આ દરમિયાન તેમણે વ્હાઇટ હાઉસ પરિસરમાં ચાલી રહેલા નવા બાંધકામની માહિતી આપી હતી અને તેની સરખામણી ચીનના ‘ગ્રેટ હોલ ઑફ ધ પીપલ’ સાથે કરી હતી.
વ્હાઇટ હાઉસમાં ભવ્ય સભાખંડ સાથે સૈન્ય સંકુલ
ટ્રમ્પના જણાવ્યા મુજબ વ્હાઇટ હાઉસ પરિસરમાં એક વિશાળ સભાખંડ અને સૈન્ય સંકુલનું નિર્માણ થઈ રહ્યું છે. તેમણે આ નવા ભવનને વિશ્વમાં પોતાની રીતે શ્રેષ્ઠ ગણાવ્યું હતું.
ટ્રમ્પે નવા હેલિપેડ અંગે પણ માહિતી આપી હતી. તેમણે કહ્યું કે અગાઉ હેલિકોપ્ટરને ભીની ઘાસ પર ઉતારવા પડતાં હતાં, જે સુરક્ષાની દૃષ્ટિએ યોગ્ય નહોતું. હવે વ્હાઇટ હાઉસમાં વધુ યોગ્ય હેલિપેડ બનાવવામાં આવી રહ્યું છે.
શી સાથેની બેઠકમાં કયા મુદ્દા ચર્ચાશે?
મુલાકાતની સત્તાવાર તારીખ હજુ નક્કી થઈ નથી. જોકે, જો શી જિનપિંગ અમેરિકા આવે છે તો બંને નેતાઓ વચ્ચે વેપાર, ટેકનોલોજી, તાઇવાન અને વ્યૂહાત્મક સ્પર્ધા જેવા મહત્વના મુદ્દાઓ પર ચર્ચા થવાની શક્યતા છે.
અમેરિકા અને ચીન વચ્ચે છેલ્લા ઘણા સમયથી વેપાર અને વ્યૂહાત્મક મુદ્દાઓને લઈને તણાવ રહ્યો છે. આવી સ્થિતિમાં બંને રાષ્ટ્રપ્રમુખોની મુલાકાતને મહત્વપૂર્ણ રાજદ્વારી ઘટનાક્રમ તરીકે જોવામાં આવી રહી છે.
‘ગ્રેટ હોલ ઑફ ધ પીપલ’ જેવી ભવ્યતા
બીજિંગમાં આવેલું ‘ગ્રેટ હોલ ઑફ ધ પીપલ’ ચીનની મહત્વપૂર્ણ સરકારી ઇમારતોમાંનું એક છે. અહીં રાષ્ટ્રીય કાર્યક્રમો, વિદેશી નેતાઓના સ્વાગત સમારોહ અને નેશનલ પિપલ્સ કોંગ્રેસની બેઠકો યોજાય છે.
ટ્રમ્પે વ્હાઇટ હાઉસ પરિસરમાં બની રહેલા નવા ભવ્ય સભાખંડની સરખામણી આ ઇમારત સાથે કરીને તેના વિશાળ કદ અને મહત્વને રેખાંકિત કર્યું છે.
