બાંધકામ સાઇટ પરથી ચોરી અને ચોરાઉ માલની ખરીદી કરનાર સામે પોલીસની કડક કાર્યવાહી
રાજકોટ: શહેરમાં બાંધકામ સાઇટ પરથી એલ્યુમિનિયમ પ્લેટની ચોરી કરનાર બે આરોપી અને ચોરાઉ માલ ખરીદનાર ભંગાર વેપારી સામે પોલીસે પાસા (PASA) હેઠળ કાર્યવાહી કરી છે. પોલીસ કમિશનરના આદેશ બાદ ક્રાઇમ બ્રાન્ચે ત્રણેયની અટકાયત કરીને જુદી જુદી જેલમાં મોકલી આપ્યા છે.
પોલીસ તપાસમાં સામે આવ્યું હતું કે આરોપીઓ વારંવાર મિલકત સંબંધિત ગુનાઓમાં સંડોવાયેલા હતા અને ચોરાઉ માલના ગેરકાયદે વેપારમાં પણ સક્રિય હતા. આ આધારે તેમની સામે પાસાની દરખાસ્ત તૈયાર કરવામાં આવી હતી, જેને મંજૂરી મળતાં વોરંટ જાહેર કરવામાં આવ્યું હતું.
ક્રાઇમ બ્રાન્ચે વોરંટની અમલવારી કરીને રોહિત ઉર્ફે બાવલો મનજી વાઘેલા, કલ્પેશ અર્જુન માથાસુરીયા અને ભંગાર વેપારી મનોજ કાંતિ સોલંકીની ધરપકડ કરી હતી. ત્યારબાદ મનોજ સોલંકીને મહેસાણા, રોહિતને અમદાવાદ અને કલ્પેશને પાલનપુર જેલ ખાતે મોકલવામાં આવ્યા હતા.
પોલીસનું કહેવું છે કે મિલકત સંબંધિત ગુનાઓ અને ચોરાઉ માલના ગેરકાયદે વેપાર સામે આવી કડક કાર્યવાહી આગળ પણ સતત ચાલુ રહેશે.
