ચીફ જસ્ટિસ સૂર્ય કાંતે કહ્યું- મુદ્દો મહત્વપૂર્ણ, ટ્રાફિક અને આવશ્યક સેવાઓ પર અસરની ચિંતા
નવી દિલ્હી: જંતર-મંતર ખાતે ધરણા અને વિરોધ પ્રદર્શનના બદલે અન્ય સ્થળ નક્કી કરવાની માંગ કરતી અરજી પર સુપ્રીમ કોર્ટે કેન્દ્ર સરકારને નોટિસ જારી કરી છે. અરજીમાં દલીલ કરવામાં આવી છે કે સતત પ્રદર્શનને કારણે ટ્રાફિક વ્યવસ્થા અને તબીબી સહિતની આવશ્યક સેવાઓ પ્રભાવિત થાય છે.
ચીફ જસ્ટિસ સૂર્ય કાંતે સુનાવણી દરમિયાન કહ્યું કે આ ગંભીર અને મહત્વપૂર્ણ મુદ્દો છે. તેમણે કેન્દ્ર સરકારનો અભિપ્રાય માંગતાં કેસને અલગથી સુનાવણી માટે સૂચિબદ્ધ કરવાનો આદેશ આપ્યો.
સુનાવણી દરમિયાન વકીલે સંભવિત રાજકીય કૂચનો મુદ્દો પણ ઉઠાવ્યો હતો. તેના જવાબમાં ચીફ જસ્ટિસે જણાવ્યું કે કાયદો-વ્યવસ્થા જાળવવાની જવાબદારી સંબંધિત તંત્રની છે અને જરૂર પડશે તો તેઓ અદાલતનો સંપર્ક કરી શકશે.
હાલ સુપ્રીમ કોર્ટે કેન્દ્ર સરકારનો જવાબ માંગ્યો છે અને તેના આધારે આગળની કાર્યવાહી હાથ ધરાશે.
