અમેરિકામાં રાષ્ટ્રપતિ ડોનાલ્ડ ટ્રમ્પ અને મોટા મીડિયા હાઉસ વચ્ચેનો વિવાદ હવે વધુ ઉગ્ર બન્યો છે. CNN, MS NOW અને Politicoના પત્રકારોને વ્હાઇટ હાઉસમાં પ્રવેશ પર પ્રતિબંધ મૂકાયા બાદ આ ત્રણેય મીડિયા સંસ્થાઓએ ટ્રમ્પ પ્રશાસન સામે ફેડરલ કોર્ટમાં કેસ દાખલ કર્યો છે. મીડિયા સંસ્થાઓનો આક્ષેપ છે કે તેમના કવરેજને કારણે તેમને નિશાન બનાવવામાં આવ્યા છે અને આ કાર્યવાહી પ્રથમ બંધારણીય સુધારા હેઠળની પ્રેસ સ્વતંત્રતાના અધિકારોનું ઉલ્લંઘન કરે છે.
વિવાદ વચ્ચે અમેરિકાની મોટી ટીવી નેટવર્ક્સ ABC, CBS, NBC, Fox News અને CNN સાથે જોડાયેલા રોટેશનલ ટીવી પ્રેસ પૂલે પણ રાષ્ટ્રપતિના કાર્યક્રમોનું સંયુક્ત વીડિયો કવરેજ સ્થગિત કર્યું છે. સામાન્ય રીતે આ પૂલમાં નેટવર્ક્સ વારા પ્રમાણે રાષ્ટ્રપતિના કાર્યક્રમોનું વીડિયો કવરેજ કરે છે અને ત્યારબાદ અન્ય મીડિયા સંસ્થાઓને ફીડ ઉપલબ્ધ કરાવે છે.
વ્હાઇટ હાઉસે શરૂ કરી 24 કલાકની ‘TRUMP TV’
પરંપરાગત ટીવી નેટવર્ક્સ સાથે વિવાદ વચ્ચે વ્હાઇટ હાઉસે હવે પોતાની ડિજિટલ વીડિયો સ્ટ્રીમિંગ સેવા ‘TRUMP TV: The Essentials Station’ શરૂ કરી છે. 21 સપ્ટેમ્બરે શરૂ થયેલી આ સેવા 24 કલાક વીડિયો સ્ટ્રીમિંગ માટે બનાવવામાં આવી છે. તેમાં ટ્રમ્પના ભાષણો, વહીવટીતંત્રની જાહેરાતો, મહત્વના કાર્યક્રમો અને અગાઉના જાહેર કાર્યક્રમોના વીડિયો દર્શાવવામાં આવે છે.
વ્હાઇટ હાઉસે આ પહેલ એવા સમયે શરૂ કરી છે જ્યારે પરંપરાગત ટીવી પ્રેસ પૂલનું કવરેજ અટકી ગયું છે. તેથી રાષ્ટ્રપતિના કાર્યક્રમોના વીડિયો માટે વ્હાઇટ હાઉસ હવે પોતાની સીધી ફીડ ઉપલબ્ધ કરાવી શકે છે.
CNN, MS NOW અને Politico કોર્ટમાં
18 સપ્ટેમ્બરે ટ્રમ્પે CNN, MS NOW અને Politicoને વ્હાઇટ હાઉસમાંથી પ્રતિબંધિત કરવાની જાહેરાત કરી હતી. ત્યારબાદ ત્રણેય સંસ્થાઓના પત્રકારોને વ્હાઇટ હાઉસમાં પ્રવેશ ન આપવામાં આવ્યો અને તેમના પ્રેસ ક્રેડેન્શિયલ્સ પરત લેવામાં આવ્યા. ટ્રમ્પે આ સંસ્થાઓના કવરેજને ‘ફેક ન્યૂઝ’ ગણાવ્યું છે.
21 સપ્ટેમ્બરે CNN, MS NOW અને Politicoએ વોશિંગ્ટન ડીસીની ફેડરલ કોર્ટમાં કેસ દાખલ કર્યો. મીડિયા સંસ્થાઓએ દલીલ કરી છે કે સરકારને પોતાના રિપોર્ટિંગથી અસહમત હોવાના આધારે કોઈ સમાચાર સંસ્થાને વ્હાઇટ હાઉસમાંથી દૂર કરવાનો અધિકાર નથી. તેમણે ઝડપી સુનાવણી અને ઍક્સેસ પુનઃસ્થાપિત કરવાની માગ કરી છે.
કેસની સુનાવણી જજ ટિમોથી કેલી સમક્ષ થઈ રહી છે. અગાઉ 2018માં CNNના પત્રકાર જિમ અકોસ્ટાના પ્રેસ ક્રેડેન્શિયલ્સ અંગેના વિવાદમાં પણ કેલીએ ટ્રમ્પ પ્રશાસન સામે આ પ્રકારનો આદેશ આપ્યો હતો.
આ સમગ્ર વિવાદ હવે માત્ર ટ્રમ્પ અને મીડિયા વચ્ચેના મતભેદ સુધી સીમિત રહ્યો નથી. વ્હાઇટ હાઉસમાં મીડિયા ઍક્સેસ, સરકારી કાર્યક્રમોના સ્વતંત્ર કવરેજ અને અમેરિકી બંધારણ હેઠળની પ્રેસ સ્વતંત્રતા અંગેનો કાનૂની મુદ્દો પણ બની ગયો છે. કોર્ટની કાર્યવાહી બાદ આ મામલે આગળની સ્થિતિ સ્પષ્ટ થશે.
