અમદાવાદ: ગુજરાતમાં આ વર્ષે ચોમાસું મોડું પડતાં ખેડૂતો અને નાગરિકોમાં ચિંતા જોવા મળી રહી હતી, પરંતુ હવે રાજ્યમાં વરસાદી માહોલ જામતા ચોમાસાના આગમનની આશા વધુ મજબૂત બની છે. છેલ્લા 24 કલાક દરમિયાન રાજ્યના અનેક વિસ્તારોમાં નોંધપાત્ર વરસાદ વરસ્યો છે અને હવામાન વિભાગે કેટલાક જિલ્લાઓ માટે રેડ તેમજ ઓરેન્જ એલર્ટ જાહેર કર્યું છે.
હવામાન વિભાગના આંકડા મુજબ, છેલ્લા 24 કલાકમાં રાજ્યના 19 તાલુકાઓમાં હળવાથી મધ્યમ વરસાદ નોંધાયો હતો, જ્યારે કેટલાક વિસ્તારોમાં ભારે વરસાદી ઝાપટાં પડ્યાં હતાં. દક્ષિણ ગુજરાત અને સૌરાષ્ટ્રના વિસ્તારોમાં વરસાદની સૌથી વધુ અસર જોવા મળી હતી.
હવામાન વિભાગની નાઉકાસ્ટ આગાહી અનુસાર ડાંગ, તાપી, નર્મદા અને છોટાઉદેપુર જિલ્લામાં ભારે વરસાદની સંભાવનાને પગલે રેડ એલર્ટ જાહેર કરવામાં આવ્યું છે. જ્યારે સુરત, નવસારી, વલસાડ તેમજ દમણ અને દાદરા નગર હવેલી વિસ્તારમાં ઓરેન્જ એલર્ટ આપવામાં આવ્યું છે.
ડાંગ જિલ્લામાં સૌથી વધુ 68 મીલીમીટર એટલે કે 2.68 ઇંચ વરસાદ નોંધાયો હતો. ખાસ કરીને સાંજના કલાકોમાં ભારે વરસાદ પડતાં અનેક વિસ્તારોમાં પાણી ભરાવાની સ્થિતિ સર્જાઈ હતી.
સૌરાષ્ટ્રના રાજકોટ જિલ્લાના ગોંડલ તાલુકામાં 54 મીલીમીટર એટલે કે 2.13 ઇંચ વરસાદ નોંધાયો હતો. ગોંડલમાં માત્ર બે કલાકના સમયગાળામાં જ મોટાભાગનો વરસાદ નોંધાતા વાતાવરણમાં ઠંડક પ્રસરી ગઈ હતી.
વલસાડ જિલ્લાના કપરાડા વિસ્તારમાં પણ 37 મીલીમીટર જેટલો વરસાદ નોંધાયો હતો. આ ઉપરાંત કોટડા સાંગાણી, ઉકાઈ, કાવંત અને રાણપુર સહિતના વિસ્તારોમાં પણ નોંધપાત્ર વરસાદ પડ્યો હતો.
હવામાન નિષ્ણાતોના મતે મુંબઈ અને આસપાસના વિસ્તારોમાં ચોમાસું સક્રિય બન્યા બાદ હવે ગુજરાતમાં પણ આગામી દિવસોમાં ચોમાસું આગળ વધવાની શક્યતા વધી ગઈ છે. દક્ષિણ ગુજરાત અને સૌરાષ્ટ્રમાં વરસાદી પ્રવૃત્તિઓમાં વધારો થતાં રાજ્યમાં ચોમાસાના સત્તાવાર પ્રવેશ માટે અનુકૂળ પરિસ્થિતિ સર્જાઈ રહી છે.
ખેડૂતો માટે પણ આ વરસાદ આશાજનક માનવામાં આવી રહ્યો છે, કારણ કે ખરીફ પાકની વાવણી માટે પૂરતા વરસાદની રાહ જોવાઈ રહી છે. આગામી દિવસોમાં વરસાદની તીવ્રતા વધે તેવી સંભાવનાને પગલે તંત્રને પણ સતર્ક રહેવા સૂચના આપવામાં આવી છે.
