નવી દિલ્હી: વડાપ્રધાન નરેન્દ્ર મોદી આગામી જુલાઈ મહિનામાં ઈન્ડોનેશિયા, ઓસ્ટ્રેલિયા અને ન્યુઝીલેન્ડના મહત્વપૂર્ણ વિદેશ પ્રવાસે જવાના છે. 6થી 11 જુલાઈ દરમિયાન યોજાનારા આ પ્રવાસ દરમિયાન ભારત અને ત્રણેય દેશો વચ્ચેના દ્વિપક્ષીય સંબંધો, વ્યાપાર, સંરક્ષણ અને વ્યૂહાત્મક સહયોગને વધુ મજબૂત બનાવવા માટે ઉચ્ચ સ્તરીય બેઠકઓ યોજાશે.
સરકારી સૂત્રોના જણાવ્યા મુજબ વડાપ્રધાન મોદીનો આ પ્રવાસ હિન્દ-પ્રશાંત (Indo-Pacific) ક્ષેત્રમાં ભારતની વધતી ભૂમિકાને વધુ મજબૂત બનાવવાના પ્રયાસનો મહત્વપૂર્ણ ભાગ માનવામાં આવી રહ્યો છે. પ્રવાસ દરમિયાન તેઓ વિવિધ દેશોના વડાઓ સાથે મુલાકાત કરીને ક્ષેત્રીય સુરક્ષા, આર્થિક સહયોગ અને વૈશ્વિક મુદ્દાઓ પર ચર્ચા કરશે.
ઈન્ડોનેશિયા પ્રવાસ દરમિયાન સમુદ્રી સુરક્ષા, બ્લૂ ઇકોનોમી અને સમુદ્રી સહયોગના મુદ્દાઓ પર વિશેષ ભાર મૂકવામાં આવશે. બંને દેશો વચ્ચે વેપાર અને વ્યૂહાત્મક ભાગીદારીને નવા આયામ આપવા માટે પણ ચર્ચા થવાની સંભાવના છે.
ઓસ્ટ્રેલિયા પ્રવાસ દરમિયાન સંરક્ષણ સહયોગ, ક્રિટિકલ મિનરલ્સ, ટેક્નોલોજી અને રોકાણ સંબંધિત મુદ્દાઓ મુખ્ય એજન્ડા પર રહેશે. ભારત અને ઓસ્ટ્રેલિયા વચ્ચે છેલ્લા કેટલાક વર્ષોમાં વધેલા વ્યૂહાત્મક સંબંધોને વધુ ગાઢ બનાવવા માટે આ મુલાકાત મહત્વપૂર્ણ ગણાઈ રહી છે.
ન્યુઝીલેન્ડમાં વડાપ્રધાન મોદી વેપાર, શિક્ષણ, કૃષિ અને લોકો વચ્ચેના સંબંધોને પ્રોત્સાહન આપવા માટે વિવિધ કાર્યક્રમોમાં ભાગ લેશે. સાથે જ ભારતીય મૂળના લોકો સાથે સંવાદ પણ યોજાશે.
આ પ્રવાસ પહેલા વડાપ્રધાન મોદી જૂન મહિનાના અંતમાં હિન્દ મહાસાગર ક્ષેત્રના મહત્વપૂર્ણ દેશ સેશેલ્સની મુલાકાત લેશે. આ મુલાકાત દરમિયાન સમુદ્રી સુરક્ષા, વિકાસ સહયોગ અને પ્રાદેશિક ભાગીદારીને લઈને ચર્ચા થવાની શક્યતા છે.
વિદેશ નીતિના નિષ્ણાતોના મતે આ પ્રવાસો ભારતના વૈશ્વિક પ્રભાવને મજબૂત બનાવવા અને હિન્દ-પ્રશાંત ક્ષેત્રમાં વ્યૂહાત્મક હાજરી વધારવા માટે મહત્વપૂર્ણ સાબિત થઈ શકે છે.
