ગાંધીનગર: ગુજરાતને વૈશ્વિક રમતગમતના કેન્દ્ર તરીકે વિકસાવવાના પ્રયાસોને વધુ વેગ મળ્યો છે. 2031ની વર્લ્ડ એથ્લેટિક્સ ચેમ્પિયનશિપ અને 2028ની વર્લ્ડ એથ્લેટિક્સ અંડર-20 ચેમ્પિયનશિપના સંભવિત આયોજન માટે વર્લ્ડ એથ્લેટિક્સનું પાંચ સભ્યોનું પ્રતિનિધિમંડળ બે દિવસીય મુલાકાતે ગુજરાત પહોંચ્યું છે.
બિડ ઇવેલ્યુએશન પેનલના ચેરમેન એંટી ફિલ્હાકોસ્કીના નેતૃત્વ હેઠળ આવેલા પ્રતિનિધિમંડળે પોતાના પ્રવાસની શરૂઆત ગાંધીનગર ખાતે મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથેની બેઠકથી કરી હતી. બેઠક દરમિયાન રાજ્યમાં ઉપલબ્ધ રમતગમત ઇન્ફ્રાસ્ટ્રક્ચર, ખેલાડીઓ માટેની સુવિધાઓ અને આંતરરાષ્ટ્રીય સ્તરની તૈયારીઓ અંગે વિસ્તૃત ચર્ચા કરવામાં આવી હતી.
મુખ્યમંત્રી ભૂપેન્દ્ર પટેલે પ્રતિનિધિમંડળને જણાવ્યું હતું કે ગુજરાતે છેલ્લા કેટલાક વર્ષોમાં રમતગમત ક્ષેત્રે નોંધપાત્ર વિકાસ કર્યો છે અને રાજ્ય પાસે આંતરરાષ્ટ્રીય કક્ષાની સ્પર્ધાઓનું સફળ આયોજન કરવાની સંપૂર્ણ ક્ષમતા છે. તેમણે વિશ્વાસ વ્યક્ત કર્યો હતો કે ગુજરાતના આધુનિક રમતગમત માળખા અને સ્પોર્ટ્સ કલ્ચરથી પ્રતિનિધિમંડળ પ્રભાવિત થશે.
નાયબ મુખ્યમંત્રી હર્ષ સંઘવીએ જણાવ્યું હતું કે રાજ્ય સરકાર વર્લ્ડ પોલીસ એન્ડ ફાયર ગેમ્સ, કોમનવેલ્થ ગેમ્સ-2030 અને અન્ય આંતરરાષ્ટ્રીય સ્પર્ધાઓના આયોજન માટે જરૂરી તમામ સુવિધાઓ વિકસાવી રહી છે. તેમણે ઉમેર્યું કે વીર સાવરકર સ્પોર્ટ્સ કોમ્પ્લેક્સ, સરદાર પટેલ સ્પોર્ટ્સ એન્કલેવ, નરેન્દ્ર મોદી સ્ટેડિયમ અને કરાઈ એકેડમી જેવી સુવિધાઓને વૈશ્વિક ધોરણો અનુસાર તૈયાર કરવામાં આવી રહી છે.
પ્રતિનિધિમંડળ આગામી દિવસોમાં વિવિધ રમતગમત સંકુલો, તાલીમ કેન્દ્રો અને સહાયક સુવિધાઓની મુલાકાત લઈને રાજ્યની તૈયારીઓનું મૂલ્યાંકન કરશે. આ મુલાકાતના આધારે ભવિષ્યમાં ગુજરાતને આ પ્રતિષ્ઠિત સ્પર્ધાઓની યજમાની સોંપવા અંગે નિર્ણય લેવામાં આવશે.
રમતગમત નિષ્ણાતોના મતે, જો ગુજરાતને 2031ની વર્લ્ડ એથ્લેટિક્સ ચેમ્પિયનશિપની યજમાની મળે તો તે રાજ્ય તેમજ દેશ માટે ઐતિહાસિક સિદ્ધિ સાબિત થઈ શકે છે અને વૈશ્વિક રમતગમતના નકશા પર ભારતની સ્થિતિ વધુ મજબૂત બની શકે છે.
