રાજકોટ: જંગલેશ્વર ડિમોલિશન દરમિયાન કાજુકતરી, પીવાના પાણી, મંડપ સહિતના ખર્ચને લઈને ચાલી રહેલા વિવાદમાં નવો વળાંક આવ્યો હોવાનું સામે આવી રહ્યું છે. કોન્ટ્રાક્ટ મંજૂરી પ્રક્રિયા અંગે નવા દાવાઓને પગલે સમગ્ર મામલે ચર્ચા તેજ બની છે.
મળતી માહિતી મુજબ, સંબંધિત કોન્ટ્રાક્ટ તત્કાલીન મ્યુનિસિપલ કમિશનર આનંદ પટેલના કાર્યકાળ દરમિયાન તેમજ તે સમયની સ્ટેન્ડિંગ કમિટીની મંજૂરી બાદ આપવામાં આવ્યો હોવાનું કહેવાઈ રહ્યું છે. આ દાવા મુજબ, પૂર્વ સ્ટેન્ડિંગ કમિટીના ચેરમેન કે વર્તમાન ચેરમેનની આ મંજૂરી પ્રક્રિયામાં કોઈ સીધી ભૂમિકા ન હતી.
આ સમગ્ર વિવાદને ધ્યાનમાં રાખીને વર્તમાન મ્યુનિસિપલ કમિશનર તુષાર સુમેરાએ તપાસ સમિતિની રચના કરી છે. સમિતિને સમગ્ર કોન્ટ્રાક્ટ પ્રક્રિયા, ખર્ચ અને વહીવટી મંજૂરીઓની તપાસ સોંપવામાં આવી છે.
સૂત્રોના જણાવ્યા મુજબ, તપાસ સમિતિ આગામી થોડા દિવસોમાં પોતાનો અહેવાલ રજૂ કરે તેવી શક્યતા છે. ત્યારબાદ સમગ્ર મામલે સત્તાવાર વિગતો જાહેર કરવામાં આવશે અને જો કોઈ અનિયમિતતા સામે આવશે તો નિયમ મુજબ આગળની કાર્યવાહી હાથ ધરાશે.
જંગલેશ્વર ડિમોલિશનના ખર્ચને લઈને છેલ્લા કેટલાક દિવસોથી રાજકીય અને જાહેર સ્તરે ચર્ચા ચાલી રહી છે. હવે તપાસ સમિતિના અહેવાલ પર સૌની નજર ટકેલી છે.
