ગાંધીનગર: ગુજરાતમાં ચોમાસું ફરી સક્રિય બનતા છેલ્લા 24 કલાક દરમિયાન રાજ્યના કુલ 112 તાલુકાઓમાં વરસાદ નોંધાયો છે. રાજ્યના અનેક વિસ્તારોમાં હળવાથી મધ્યમ વરસાદ વરસતાં ગરમી અને ઉકળાટમાંથી લોકોને રાહત મળી છે, જ્યારે ખેડૂતોમાં પણ ખુશીનો માહોલ જોવા મળી રહ્યો છે.
રાજ્યમાં સૌથી વધુ વરસાદ રાજકોટ જિલ્લાના પડધરી તાલુકામાં 2.24 ઇંચ નોંધાયો છે. ત્યારબાદ સુરત જિલ્લાના કામરેજમાં 1.81 ઇંચ, કચ્છ જિલ્લાના રાપરમાં 1.69 ઇંચ તેમજ સુરત જિલ્લાના માંગરોળ અને બારડોલીમાં 1.50 ઇંચ વરસાદ નોંધાયો છે.
આ ઉપરાંત સૌરાષ્ટ્ર, દક્ષિણ ગુજરાત અને કચ્છના અનેક તાલુકાઓમાં પણ છૂટાછવાયા વરસાદી ઝાપટાં પડ્યાં હતા. વરસાદને કારણે વાતાવરણમાં ઠંડક પ્રસરી છે અને લાંબા સમયથી અનુભવાતી ગરમીમાંથી લોકોને રાહત મળી છે.
ખેડૂતો માટે પણ આ વરસાદ આશીર્વાદ સમાન માનવામાં આવી રહ્યો છે. સમયસર વરસી રહેલા વરસાદને કારણે ખરીફ પાક માટે અનુકૂળ પરિસ્થિતિ સર્જાઈ છે અને વાવેતર તેમજ પાકના વિકાસને ગતિ મળશે તેવી આશા વ્યક્ત કરવામાં આવી રહી છે.
હવામાન વિભાગના અનુમાન મુજબ આગામી દિવસોમાં પણ રાજ્યના વિવિધ વિસ્તારોમાં હળવાથી મધ્યમ વરસાદી પ્રવૃત્તિ યથાવત રહેવાની શક્યતા છે. ખાસ કરીને દક્ષિણ ગુજરાત અને સૌરાષ્ટ્રના કેટલાક વિસ્તારોમાં વરસાદનું પ્રમાણ વધે તેવી સંભાવના વ્યક્ત કરવામાં આવી છે.
વરસાદની સતત આવકને કારણે રાજ્યના ડેમો અને જળાશયોમાં પણ પાણીના સંગ્રહમાં વધારો થવાની આશા છે, જે આગામી સમયમાં પીવાના પાણી અને સિંચાઈ માટે લાભદાયી સાબિત થશે.
