રાજકોટ: શહેરમાં ખાદ્ય સુરક્ષા અને સ્વચ્છતાના ધોરણો જળવાઈ રહે તે માટે રાજકોટ મહાનગરપાલિકાએ વિશેષ ફૂડ સેફ્ટી ડ્રાઇવ શરૂ કરી છે. છેલ્લા છ દિવસ દરમિયાન ફૂડ વિભાગે શહેરભરની 400થી વધુ ખાણીપીણીની પેઢીઓમાં તપાસ હાથ ધરી હતી, જેમાં અનેક ગેરરીતિઓ સામે આવી છે.
મહાનગરપાલિકાના ફૂડ વિભાગ દ્વારા હાથ ધરાયેલી આ ઝુંબેશ દરમિયાન વિવિધ હોટલ, રેસ્ટોરન્ટ, ફાસ્ટ ફૂડ સેન્ટર અને ખાદ્ય પદાર્થો વેચતા એકમોની ચકાસણી કરવામાં આવી હતી. તપાસ દરમિયાન સ્વચ્છતા અને ગુણવત્તાના ધોરણોનું પાલન ન થતું હોવાનું સામે આવતા તંત્રે કડક કાર્યવાહી કરી છે.
અધિકારીઓના જણાવ્યા મુજબ, ડ્રાઇવ દરમિયાન અંદાજે 2900 કિલો અખાદ્ય અને બિનઉપયોગી ખોરાકનો નાશ કરવામાં આવ્યો હતો. ઉપરાંત નિયમોનું ઉલ્લંઘન કરનાર સંચાલકો પાસેથી કુલ રૂ. 31,800નો દંડ પણ વસૂલવામાં આવ્યો છે.
તપાસમાં હાઇજીન અને ફૂડ સેફ્ટીના નિયમોનું પાલન ન કરતી 131 ખાણીપીણીની પેઢીઓને નોટિસ ફટકારવામાં આવી છે. જ્યારે ગંભીર બેદરકારી અને આરોગ્ય માટે જોખમરૂપ સ્થિતિ જોવા મળતાં ચાર પેઢીઓને સીલ કરવાની કાર્યવાહી કરવામાં આવી હતી.
મહાનગરપાલિકાના અધિકારીઓએ જણાવ્યું કે આ અભિયાનનો મુખ્ય હેતુ નાગરિકોને સ્વચ્છ અને સુરક્ષિત ખાદ્ય પદાર્થો ઉપલબ્ધ કરાવવાનો છે. નિયમોનું પાલન ન કરનાર એકમો સામે આગામી સમયમાં પણ કડક કાર્યવાહી ચાલુ રહેશે.
ફૂડ વિભાગે વધુમાં જણાવ્યું છે કે આગામી દિવસોમાં શહેરની મિઠાઈની દુકાનો, દૂધની ડેરીઓ અને બેકરીઓમાં વિશેષ ચેકિંગ અભિયાન હાથ ધરવામાં આવશે. ખાદ્ય સુરક્ષા સંબંધિત નિયમોનું પાલન થાય તે માટે સતત દેખરેખ રાખવામાં આવશે.
રાજકોટ મહાનગરપાલિકાની આ કાર્યવાહી બાદ ખાણીપીણીના ધંધાર્થીઓમાં ચકચાર મચી છે, જ્યારે નાગરિકોએ સ્વચ્છ અને ગુણવત્તાયુક્ત ખોરાક માટે તંત્રની કામગીરીને આવકારી છે.
