રાજકોટ: રાજકોટ મહાનગરપાલિકામાં અગાઉ વિવિધ કારણોસર ચર્ચામાં રહેલા એક અધિકારીને ફરી મહત્વની જવાબદારી સોંપાયા બાદ કર્મચારી વર્તુળોમાં અસંતોષની ચર્ચા તેજ બની છે. કેટલાક કર્મચારીઓનો આક્ષેપ છે કે અધિકારી દ્વારા પટ્ટાવાળા સહિતના નીચલા કક્ષાના કર્મચારીઓ પર બિનજરૂરી દબાણ કરવામાં આવી રહ્યું છે.
કર્મચારીઓના જણાવ્યા મુજબ, ડ્રેસ કોડનું કડક પાલન કરાવવા ઉપરાંત કચેરીની લોબીમાં કોણ આવે છે અને કોણ જાય છે તેની માહિતી એકત્રિત કરી અધિકારીઓને જાણ કરવાની મૌખિક સૂચનાઓ આપવામાં આવી રહી હોવાના આક્ષેપો કરવામાં આવ્યા છે.
આ પ્રકારની કામગીરીના કારણે પટ્ટાવાળા સહિતના કેટલાક કર્મચારીઓમાં અસંતોષ અને નારાજગી જોવા મળી રહી હોવાનું ચર્ચાઈ રહ્યું છે. કર્મચારીઓનું કહેવું છે કે તેઓ પર સતત દેખરેખ અને વધારાના દબાણના કારણે કામકાજનું વાતાવરણ પ્રભાવિત થઈ રહ્યું છે.
જોકે, આ સમગ્ર મામલે સંબંધિત અધિકારી અથવા મહાનગરપાલિકા તંત્ર તરફથી કોઈ સત્તાવાર પ્રતિક્રિયા સામે આવી નથી. જો કર્મચારીઓ દ્વારા કરવામાં આવેલા આક્ષેપોને લઈને તંત્ર તરફથી કોઈ સ્પષ્ટતા કરવામાં આવશે તો સમગ્ર સ્થિતિ વધુ સ્પષ્ટ થઈ શકશે.
